Сүхбаатар дүүргийн шүүхээс дөрвөн жилийн хорих ялаар шийтгүүлсэн МАХН-ын дарга Н.Энхбаярын гомдлыг өчигдөр Нийслэлийн шүүхийн Эрүүгийн танхимд 08.30 цагаас шөнийн 00.00 цаг хүртэл хэлэлцлээ. Шүүх хуралдаан удаан үргэлжсэний эцэст түүнд оноосон дөрвөн жилийн ялыг хэвээр батлав. Хуралд даргалагч шүүгчээр Нийслэлийн шүүхийн Ерөнхий шүүгч Б.Сарантуяа, илтгэгч шүүгчээр Г.Алтанчимэг, шүүгчдэгчдийн өмгөөлөгч нар оролцсон юм.
Гэвч хоёр шатны шүүхээс оноосон ялыг Н.Энхбаяр болон өмгөөлөгч нар нь хүлээн зөвшөөрөхгүй хяналтын шатны шүүхэд буюу Улсын дээд шүүхэд хандахаа мэдэгдлээ. Н.Энхбаярыг Эрүүгийн хуулийн 263.2, 150.3-т зааснаар буруутган, Сүхбаатар дүүргийн шүүхээс ял оноосон юм. Н.Энхбаяр өдгөө Сайд нарын гэгдэх Клиникийн хоёрдугаарт эмнэлэгт эмчилгээ хийлгэж байгаа билээ.
Б.Чимэг
