УИХ-ын чуулганы хуралдаанаар Засгийн газраас өргөн мэдүүлсэн “Монгол Улсын хөгжлийн 2022 оны төлөвлөгөө батлах тухай” Улсын Их Хурлын тогтоолын төслийн хэлэлцэх эсэхийг хэлэлцэж байна. 

УИХ-ын гишүүн С.Бямбацогт “Эрдэнэбүрэнгийн УЦС-ыг байгуулах гэж сүүлийн 50 жил хөөцөлдөж байна. Ерөнхийлөгч газар дээр нь хоёр удаа очиж байж, ажлыг эхлүүлсэн. Тун удахгүй Ерөнхий сайд Ховд аймагт очиж, Эрдэнэбүрэнгийн УЦС-ын шавыг тавина гэж байсан. Гэтэл төрийн албаны хүнд сурталтай, шан харамж, авлига хардаг хэдэн хурган түшмэдүүд энэ төслийг гацааж зогсоолоо. Эрдэнэбүрэнгийн УЦС баруун таван аймаг төдийгүй Монгол Улсын эрчим хүчний салбарт маш ач холболдолтой төсөл. Энэ төсөл хэрэгжвэл эрчим хүчний үнэ тариф тав дахин буурах боломжтой. Монгол Улс эрчим хүчний тусгаар тогтнолоо олно. 800 тэрбум төгрөгөөр таван жил хийгдэх төсөл.

Гуравдугаар сарын 22-нд тендер зарлаж, дөрөвдүгээр сарын 22-нд шалгаруулах ёстой байсан. Гэтэл тавдугаар сарын 22 хүртэл нэг удаа, зургаадугаар сарын 22 хүртэл дахин сунгасан. Энэ хоорондоо Тайширын УЦС-ыг байгуулсан туршлагатай төслийн удирдагчийг ажлаас  нь халсан. Одоо энэ тендерийг цуцалж, хүчингүй болгосон.

Хятад улс мөнгөө татлаа гэвэл яах юм, энэ төсөл гацвал хэн хариуцлага хүлээх юм бэ. Н.Тавинбэх сайд та энэ төслийг толгойгоороо хариуцна шүү. Энэ төсөл явахгүй бол та ажлаа өгч, огцорно шүү. Би танай хурган түшмэдүүдийг бүгдийг нь шалгуулна. Хариуцлагаа хүлээгээрэй. Ажлаа хийж чадвал чадаад, чадахгүй бол зайгаа тавиад зайлаарай” гэлээ.

Б.Баатар