Засгийн газрын хуралдааны шийдвэрийг танилцуулах үеэр Эрүүл мэндийн сайд С.Энхболд мэдээлэл өгч, сэтгүүлчдийн сонирхсон асуултад хариуллаа.
Тэрбээр “Дэлхий даяар нөхцөл байдал хүнд байна. Ялангуяа Европын холбооны улсад халдварын тохиолдол 10 хувиар нэмэгдсэн байна. Шалтгаан нь, хөлбөмбөгийн тэмцээн зохион байгуулсантай холбоотой. Ялангуяа дельта вирусийн мутацлагдсан хувилбар нэлээн эрчимтэй тархаж, улс орнууд хилээ хаах зэрэг арга хэмжээ авч эхлээд байна. ОХУ-ын халдварын тархалтын 90 хувь нь дельта вирус илэрсэн бол Англид очиж багаа дэмжсэн 2000 хүний 75 хувиас делтьа вирус илэрсэн. Энэ вирус илүү хоруу чанартай, маш хурдтай тархдаг. Ялангуяа шинж тэмдэг богино хугацаанд хүндэрч, вакцины үр дүнг бууруулж байна гэсэн судалгаа гарсан. Тимймээс дэлхийн улс орнууд гуравдахь тунг ярьж, зарим нь хэрэгжүүлж эхлээд байна.
Тодруулбал, Турк улс өнөөдрөөс, ОХУ мөн гурав дахь тунгаа хийж эхэлж байна. Зургаан сараас нэг жилийн дараа гуравдахь тунгаа хийж болзошгүй гэж зарлаж байсан бол өнөөдрийн нөхцөл байдалтай холбоотойгоор улс орнууд шийдвэрээ өөрчлөөд эхэлчихлээ.
-Хүй долоон худагт нөхцөл байдал ямар байна вэ. Бүх хүнийг шинжилгээнд хамруулсан уу?
-Хүй долоон худагт наадмын бэлтгэл ажил эхлэхээс өмнө бүх хүнээс шинжилгээнүүд авч байсан. Эрдсэлийн баг гарч ажилласан. 2500 орчим түргэвчилсэн тестийг эхний ээлжид өгсөн. Эмнэлгийн ажилчдыг хувийн болон хамгаалах хэрэгслээр бүрэн хангасан.
-Дельта вирус Монголд ороод иржээ гэсэн айдас бий. Энэ талын судалгаа, шинжилгээний ажлыг хэрхэн хийж байгаа вэ?
-Дельта вирус манай улсад орж ирэх нь цаг хугацааны асуудал. Судалгааны ажлыг хийсэн. Тухайн саруудын сорьцыг хадгалж, PCR шинжилгээнд суурилсан судалгааны ажил хийхэд зургаадугаар сарын сорьцод 90 хувь нь альфа хувилбар байна гэсэн дүгнэлт гарсан. Баталгаажуулахаар Япон руу 50 сорьц явуулахад альфа хувилбар давамгайлж, харин дельта вирусийн таван тохиолдол зөөвөрлөгдөн орж ирснийг тогтоосон. Эдгээр таван хүнийг тусгаарлалтад авч эмчлээд эдгээд гарсан байгаа. Та бүхэн санаж байгаа бол дөрөвдүгээр сарын эхээр халдварын тохиолдол эрс ихэссэн нь альфа хувилбар ихэссэнтэй холбоотой байсан гэлээ.
У.Тэргэл
