Коронавирусний цар тахалтай холбоотойгоор Үндэсний их баяр наадмыг нэг жилээр хойшлуулах шийдвэрийг Засгийн газраас гаргасан. Үүнээс ч өөр арга зам байгаагүй гэдгийг ч хэлэх хүн олон байна.

Харин энэ бүхнийг эхнээс нь зөв зохион байгуулсан бол иргэд хоёр хуваагдаж, Төв талбай дээр эсэргүүцлээ илэрхийлэхгүй байсан гэдгийг хэлж буй.

Энэ талаар Б.Жаргалсайхан "ЗАСГИЙН ГАЗАР БУРУУТАЙ... "No naadam" "Yes naadam" гэсэн эсэргүүцлийн хоёр арга хэмжээ яваад өнгөрлөө. Энэ тэмцлийг бий болгох ажлыг Засгийн газар хийлээ. Ерөнхийлөгчийн сонгуулийн өмнө Ерөнхий сайд Л.Оюун-Эрдэнэ "Ардын хувьсгалын 100 жилийнхээ ойг сайхан тэмдэглэнэ, Ковидгүй, маскгүй зун болно" гэж амласан. Ард түмэн баярлахын дээдээр баярласан даа. Тийм ч учраас уяачид бөхчүүд, харваачид эртнээс бэлдсэн. Дараа нь Ерөнхий сайд маань удалгүй "Оргүйгээс охинтой нь дээр гэгчээр цахимаар наадам хийе" гэхэд олон нийт дэмжсэн. Гэтэл коронагийн халдвар дийлдэхээ больсон учир наадмыг нэг жилээр хойшлуулсанд иргэд бухимдсан.

Байр суурьгүй, эргэж буцсан зангараг муутай, сошиалд хөтлөгдсөн шийдвэрүүд гаргах болжээ Засгийн газар.

Дээдэс нь доодсоо захирч чадахаа байсан, доодос нь дээдэстээ захирагдахаа байжээ" хэмээн байр сууриа илэрхийлжээ. 

Б.Баатар