УИХ-ын чуулганы нэгдсэн хуралдаанаар Элчин сайд нарыг эгүүлэн татах, томилох асуудлаар зөвшилцөх тухай тогтоолын төслийг хэлэлцэж байна. Нийтдээ 24 улсад суух Элчин сайдыг томилох сонсголыг хийж байгаа бөгөөд гишүүд хэлэлцэж байгаа асуудалтай холбоотой санал хэлж байна. 

УИХ-ын гишүүн Ц.Мөнх-Оргил: Надад асуулт алга. Ихэнх нь таньдаг, олон жил хамтарч ажилласан мэргэжлийн хүмүүс байна. Ихэнхийг нь дэмжинэ, харин хоёр хүнийг дэмжихгүй гэдгээ шууд хэлье. Цаашид Б.Батцэцэг сайд, Ерөнхийлөгчийн Тамгын газар олон Элчин сайдыг томилуулахаар оруулж ирэх байх. Гэхдээ Элчин сайдын нэр оруулж ирэхдээ цаашдаа хоёр асуудалд анхаарахыг зөвлөмөөр байна. Нэг нь Элчин сайдаар томилох хүнийг оруулж ирэхдээ 50:50 хувь гэсэн харьцааг хангамаар байна. 50:50 гэдэг нь Гадаад харилцааны яамнаас 50 хувийг, үлдсэн салбаруудаас 50 хувийг сонгож оруулж ирдэг болмоор байна.

Өнөөдөр томилох 24 Элчин сайдаас 13 нь Гадаад яамнаас, 11 нь гаднаас гээд 50:50 харьцааг хангасан харагдаж байна. Цаашдаа энэ байдлаа хадгалаад явмаар байна. Тиймээс тэнцвэрийг хангасан хүмүүсийг томилох нь зөв. 

Хоёрдугаарт, жендэрийн асуудалд анхаарч байгаач. Өнөөдрийн 24 хүний гурав нь  эмэгтэй байна. Элчин сайд хийчихээр хүн огт байхгүй бол өөр. Гэхдээ манай Гадаад харилцааны яамны газрын гол дарга нар бүгд эмэгтэйчүүд байдаг.

Гуравдугаарт, нэгээс нөгөө орон руу царцаа шиг нүүдгийг болимоор байна. Социализмын үеэс тогтсон хатуу зарчим байдаг. Элчин сайдаар дөрвөн жил ажилласан бол Монголдоо ирж дөрвөн жил арай өөр салбарт ажиллаж, мэргэшиж, илүү чадавхждаг. Үүний дараагийн дөрвөн жилд албан тушаал дэвшүүлж,  Элчин сайдаар томилох асуудлыг ярьдаг. Яг энэ асуудалтай холбоотойгоор Швейцарын Холбооны улсад Элчин сайдаар томилох Р.Алтангэрэлийг дэмжихгүй. Би өөрт нь ч хэлсэн.  Алтангэрэл Канадад ажиллаж байгаад Монголд ирээд жил бололгүй Бруселль явсан. Тэнд гурван жил болоод тэндээсээ Женев яваад одоо Швейцар руу Элчин сайдаар явах гэж байна. Уучлаарай, би энэ удаа өөрийг чинь дэмжиж чадахгүй. Энэ бол зарчим.  Хоёр дахь дэмжихгүй хүн бол Францад суух Элчин сайдаар томилох У.Нямхүү юм. Яах вэ, хэл устай сайн хүн ч энэ жил дөнгөж нэгдүгээр нарийн бичгийн дарга болсон хүн шүү дээ. Юм шат дараатай явах учиртай.

Нэгдүгээр нарийн бичгээр дөнгөж томилсон хүнийг Элчин сайдаар томилохоор цаад Францууд чинь хэрхэн хүлээн авах вэ. Энэ хүн чинь Элчин зөвлөх болно, Монголдоо ирж газрын даргаар ажиллаж байгаад ажиллах ур чадвараа харуулж байгаад Элчин сайдаар явах ёстой. Зүйрлэвэл, УИХ-ын туслах ажилтан байж байгаад Тамгын газрын дарга болж байгаатай адил шүү дээ” гэлээ.