Баянзүрх дүүргийн Энэрэл эмнэлгээс тусламж хүсэж очсон залуу тус эмнэлгийн үүдэнд, хашаа түшин суугаад амиа алдсан харамсалтай явдал болсон. Талийгаач 35 настай, модон эдлэлийн мужаан, эхнэр, 10 настай охины хамт амьдардаг байжээ. Түүний бие сүүлийн хэдэн өдөр таагүй байсан тул “Хатагтай” хувийн эмнэлэгт коронавирусний шинжилгээ өгч, хариу нь “эерэг” хариу гарчээ.

Тиймээс Яаралтай түргэн тусламжийн 103 дугаарт залган “шинжилгээний хариу эерэг гарсан, бие муу байгаагаа хэлэхэд “Энэрэл эмнэлэгт өөрийн унаагаар очих”-ыг зөвлөжээ. Тэр дагуу үеэл ахынхаа хамт тус эмнэлэгт таксигаар ирэхэд “Баянзүрх дүүргийн эмнэлэгт ханд. Чингэлтэй дүүрэгт амьдардаг бол манай эмнэлэг хүлээн авахгүй” гээд буцаажээ.

Энэ дагуу нь Баянзүрх дүүргийн Нэгдсэн эмнэлэгт очиход коронавирусний халдвар батлагдсан бол “Энэрэл” эмнэлэгт очих ёстой” хэмээн  мөн л буцаасан байдаг. Энэрэл эмнэлэгт очиход мөн хүлээн аваагүй бөгөөд энэ үеэр бие нь бүр муудаж, эмнэлгийн хашаа налан сууж байхдаа тэндээ харамсалтайгаар амьсгал хураасан байна.

Харамсалтай гэхэд дэндүү харамсмаар. Энэхүү явдалтай холбоотойгоор НЭМГ-ын эмнэлгийн тусламжийн хэлтсийн дарга М.Мөнхдэлгэр, “Энэрэл” эмнэлгийн дарга А.Амартүвшин, яаралтай тусламжийн 103 төвийн дарга Ц.Пүрэвдаш нарыг ажлаас нь чөлөөлөх арга хэмжээ авсан. Гэвч сайд мяндагтнууд доод албан тушаалын ганц нэг хүнийг ажлаас нь чөлөөлсөн болоод өөрөө сугараад үлддэг жишиг бий.

Бие муу хүнийг харсаар байж өөрсдөөсөө түлхэн хүлээж авалгүйгээр нааш цааш явуулсаар эцэст нь бүр эмнэлгийн үүдэнд амьсгал хураасан ийм харгис явдалд Эрүүл мэндийн сайд С.Энхболд, НЭМГ-ын дарга Б.Бямбадорж нар хариуцлагаа хүлээж, тэр даруй огцрох учиртай.

Цар тахлын үеийн өндөржүүлсэн бэлэн байдлын үед эмч, эмнэлгийн салбарынхан ямар дүрэм, журмаар ажиллахыг нарийвчлан заасан байдаг. Гэтэл юуны дүрэм журам. Харин ч эсрэгээрээ төр, засгаас хүнд нөхцөлд ажиллаж байгаа хэмээн цалин хөлсийг нэмж, урамшуулал олгож, байдгаараа харж үзээд байхад бодит байдалд тэдний байгаа үнэн төрх энэ.

Ирсэн даруйд хүлээн авч, эмчилгээг хийсэн бол нэгэн эцэг өнөөдөр эмнэлгийн үүдэнд горьдлого тээсээр амьсгал хураахгүй байлаа. Тиймээс энэ харгис үйлдэлдээ ар гэрийнхнээс нь уучлал гуйн огцрохыг, Ерөнхий сайд ч энэ үйлдэлд анхаарлаа хандуулаасай хэмээн хүсч бас шаардаж байна.

У.Тэргэл