УИХ-ын чуулганаар Хүний хувийн мэдээлэл хамгаалах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх эсэхийг хэлэлцэж байна. Хэлэлцэж байгаа асуудалтай холбогдуулан гишүүд асуулт асууж, хариулт авч буй юм.

УИХ-ын гишүүн Ё.Баатарбилэг: Сүүлийн үед олон нийтийн сүлжээгээр хувь хүнтэй холбоотой, төрийн байгууллагын эрхлэх асуудлын хүрээний хувь хүний нууцтай холбоотой мэдээлэл их яваа харагддаг. Өрсөлдөгчийнхөө нэр хүндийг унагаах зэргээр янз бүрийн зорилгоор гаргадаг. Энэ хуулиар арилжааны зориулалтаар янз бүрийн апп-ууд гарч ирж, татахад хурууны хээ болон хувийн мэдээлэл авдаг. Энэ болж байгаа юм уу?

Хууль зүй дотоод хэргийн сайд Х.Нямбаатар: Хуулийн гол зохицуулалт нь хувь хүний мэдээллийг хэрхэн хамгаалах вэ гэсэн асуудлыг зохицуулна. Энэ хуулийг баталбал томоохон сүлжээ дэлгүүрүүдийн хөнгөлөлтийн картад агуулагдах үйлчлүүлэгчдийн хувийн мэдээллийг авч устгах ажлыг зохион байгуулна. Хувь хүний мэдээлэл дэлгүүрүүдэд байх нь урхагтай. Хувь хүний нууцын тухай хуулийг 1995 онд анх баталсан. Энэ хуульд хувийн мэдээллээ иргэн өөрөө хариуцдаг байсан бол харин одоо төрийн оролцоо шаардлагатай болсон. Хувь хүний мэдээлэл зөвхөн төрд хадгалагдана. Тухайн хүн хурууны хээгээ уншуулах болон цахим гарын үсгээ ашиглан мэдээллээ авах юм гэв. 

ХЗДХЯ-ны ТНБД Б.Баасандорж: Энэ хуулийн гол үзэл баримтлал нь мэдээллийн эзний эрх гэдэг ойлголтыг тодруулж байгаа юм. Хувийн байгууллагуудад иргэдийн хувийн мэдээллийг маш ихээр хадгалж байна. Жишээлбэл, хувийн нэг эмнэлэгт өвчтөний мэдээллийг дамжуулахдаа тухайн иргэнээс зөвшөөрөл авч, мэдээллийг дамжуулдаг байхаар зохицуулна. Мэдээлэл авсан байгууллага мэдээллийн аюулгүй байдлыг хангах үүргийг хуулиар хүлээнэ. Дэлгүүр үйлчилгээний байгууллагууд хүний хурууны хээг замбараагүй ашиглаж байгааг энэ хуулиар цэгцэлнэ. Хувийн мэдээллийг зөвхөн төрд хадгалж буйн учир нь тухайн иргэний хувийн мэдээллийг өөр хүн авсан тохиолдолд тухайн иргэнд мэдээлэл очно. Зөвшөөрөлгүйгээр мэдээлэл авбал тухайн иргэн гомдол гаргах эрх зүйн орчин бүрдэх юм. 

Чуулганы хуралдаан үргэлжилж байна.