Монгол Улсын Ерөнхийлөгчийн сонгууль дуусч, Төрийн тэргүүнээ сонгон асуудал цэгцэрсэн. Гэвч араас нь нөхөн сонгууль залгаж, Ерөнхийлөгч У.Хүрэлсүхийн тойрогт нөхөн сонгууль зохион байгуулах товыг УИХ-аар энэ долоо хоногт хэлэлцэн батална.

Ингэхдээ Хэнтий аймаг буюу УИХ-ын сонгуулийн XVIII тойрогт явуулах нөхөн сонгуулийг 2021 оны аравдугаар сарын 10-ны өдөр зохион байгуулах товтой байна. Мөн энэхүү нөхөн сонгуультай хамт УИХ-ын XXVIII тойрог буюу Улаанбаатар хотын Захирагч Д.Сумъяабазарын орны хүнийг сонгох бөгөөд энэхүү хоёр тойрогт болох нөхөн сонгуулийн зардал нь 2.2 тэрбум  төгрөг байх юм.

Энэ дагуу МАН, АН, ХҮН УИХ дахь суудлын тоогоо нэмэхээр санаархаж, өөр өөрийн хүнээ сойхоор бэлдэж эхэлсэн. Сонгинохайрхан дүүрэгт  гэхэд л өмнө өрсөлдөөд өвдөг шороодсон Э.Батшугарын нэр зоолттой явдаг. Харин энэ удаад ч хоёр нам нэгдсэний “хариуд” Э.Батшугарыг нэр дэвшүүлэх тохироотой яваа.

Гэвч түүний өрсөлдөгчид чамгүй боловсрол, мэдлэгтэй эрхмүүд байх нь тодорхой. Тодруулбал, Ерөнхийлөгч асан Х.Баттулгын ч нэр дуулдах болсон нь зүгээр нэг хоосон яриа биш гэдгийг батлах хүн олон байна.  

Ирэх намар болох нөхөн сонгуулийн хамгийн ихээр анхаарал татаж байгаа тойрог бол Хэнтийнх. Нэр дэвшигч нь Ерөнхийлөгч болсон  учир түүний орыг залгах хүнийг зүгээр нэг сонгочихгүй, шалгуур, босго өндөр байж таарна.

Тэр хэрээр өрсөлдөөн ч ширүүснэ. Харин АН-ын хувьд дотооддоо хэл амаа ололцохгүйгээр УИХ, Ерөнхийлөгчийн сонгуульд оролцсон. Өдгөө ч энэ байдал хэвээр үргэлжилсээр байгаа тул өрсөлдөхүйц хэмжээний нэр дэвшигчийг тодруулан өрсөлдүүлнэ гэхэд итгэл үнэмшил бага. Гэвч ирэх намар хүртэл бас хугацаа байна.

Харин ХҮН-ын хувьд УИХ, Ерөнхийлөгчийн сонгуульд амжилттай оролцсондоо эрдэн УИХ-д дахин нэг суудалтай болох гэж зүтгэх нь дамжиггүй. Энэ мэт ирэх намар улс төр халуухан өрнөж, УИХ, Монгол Улсын Ерөнхийлөгчийн сонгуулиас дутахгүй дуулиантай нөхөн сонгууль болох нь тодорхой байгаа юм.

У.Тэргэл