Хууль зүй, дотоод хэргийн сайдаар ахлуулсан баг яг одоо Замын-Үүдэд ажиллаж байна. Энэ үеэр Х.Нямбаатар сайд цаг үеийн нийтэд мэдээлэл өгч, зарим нэгэн албан тушаалтнуудыг ажлаас нь чөлөөлж, мэргэжлийн хяналт, хилийн байцаагчдыг сэлгэн ажиллуулахаар болсноо, цаашид ямар арга хэмжээ авах болсноо мэдэгдлээ.

Тухайлбал, Дорноговь аймгийн Замын-Үүд дэх Цагдаагийн газрын дарга, цагдаагийн хошууч Уранбаярыг долоодугаар сарын 6-наар  тасалбар болгож, үүрэгт ажлаас нь чөлөөллөө. Мөн Гаалийн ерөнхий газрын даргын тушаалаар Замын-Үүд дэх гаалийн байцаагчдыг бүхэлд нь өөр орон нутагт шилжүүлэн ажиллуулж, өөр боомтод ажиллаж байгаа албан хаагчдыг сэлгүүлэн ажиллуулахаар болсон байна.

Замын-Үүд суманд АТГ, ЦЕГ, ТЕГ-ын хамтарч ажлын хэсэг гарч ажиллаж байгаа. Энэ боомтод яг одоо бус өмнө бугшсан авлига албан тушаалын хэргийг шалгаж, холбоотой зарим хүнд эрүүгийн хэрэг үүсгэж, яллагдагчаар татах үйл явц энэ цагт явуулж байна. Одоогоор зургаан албан тушаалтныг яллагдагчаар татах болсныг АТГ-ын комиссар сая мэдээлсэн.

Таслан сэргийлэх цагдан хорих арга хэмжээ авч шалгахаар болсон. Цаашлаад Ковидын үед  албан тушаалын давуу байдлаа урвуулан ашиглан шан харамж авсан асуудлыг дээр дурдсан албан байгууллагуудын удирдлагуудыг үргэлжлүүлэн шалгахаар болсон. Монгол Улсын Засгийн газрын үйл ажиллагааны хөтөлбөрийн хамгийн том зорилт бол авлига албан тушаалтнуудтай тэмцэх юм.

Энэ хүрээнд өнөөдөр анхан болон дунд шатанд байгаа авлига албан тушаалын хэргийг шалгаж, цэгцлэх ажил үндсэндээ эхэлж байна. Замын-Үүдийн мафи гэж ярьдаг зүйлтэй Засгийн газар тэмцэхээ одооноос эхэлж байгаа гэж ойлгож болно” гэлээ.  

У.Тэргэл