Монгол Улсын Засгийн газрын өнөөдрийн ээлжит хуралдаанаас гаргасан зарим шийдвэрийн талаар мэдээллээ.
Улсын Онцгой комиссын нарийн бичгийн дарга Т.Баярхүү "Зуны дэлгэр цаг ирж байгаатай холбоотойгоор хөдөлгөөний эрчим нэмэгдэх хандлагатай байна. Өнөөдрийн байдлаар 18 аймгийн 196 сум, зургаан тосгонд хязгаарлалтын дэглэм тогтоогоод байна. Эдгээр хязгаарлалтын дэглэм тогтоосон бүс нутгаас 13 аймгийн 101 сум нь долоодугаар сарын 9-ны өдрөөс эхлэн өмнөх хязгаарлалтын хугацаа дуусах юм.
Харин 11 аймгийн 100 суманд хязгаарлалтын дэглэм үргэлжлэх төлөвтэй байгаа. Тиймээс УОК-оос хязгаарлалтын хугацаа нь дуусаж байгаа газруудад нэмэлтээр хязгаарлалт тогтоохгүй, хугацааг нь сунгахгүй байх чиглэлийг өгч байна.
Экспорт, импортын гол урсгал явдаг Өмнөговь, Дорноговь аймаг руу өмнөх тогтоосон журмын дагуу зорчино. Боомтын бүс нутагт хатуу хорионы дэглэм үйлчилнэ.
2021 оны долоодугаар сарын 17-ны өдөр гэхэд орон нутгийн халдварын тоо өдөрт 1300-гаар нэмэгдэж, эмнэлэгт хэвтэх хүмүүсийн тоо 20 хувиар нэмэгдэнэ гэдгийг ХӨСҮТ-өөс тооцоо судалгаа гаргасан. Тиймээс УОК-оос иргэдийг хот орчмын амралтын газруудад үйлчлүүлэхийг зөвлөж байна. Учир нь амралт жуулчны газрууд НЗДТГ-тай хариуцлагыг гэрээ байгуулан ажиллаж байгаа юм.
Коронавирусний халдвараар 0-18 насны 27480 хүүхэд өвчлөөд байгаа ба нийт тохиолдлын тоо 27 хувийг эзэлж байна. Тиймээс аялж байгаа гэр бүлээс түүврийн аргаар 5-аас дээш насны хүүхдүүдээс шинжилгээ авна. Гэр бүлээрээ болон найз нөхдийн хүрээнд буюу аяллын багийн гишүүдийн тоог таваас хэтрүүлэхгүй байхыг зөвлөж байна.
Аяллаар явж байгаа иргэд суурин газраар орохгүй. Харин шатахуун, хүнс, эмийн сан, эмнэлгийн тусламж, тээврийн хэрэгслийн засвар үйлчилгээ авах тохиолдолд л орж болно. Өөрөөр хэлбэл орон нутгийн хот суурин газарт амьдардаг танил, ээж аавындаа очиж халдвар тараах эрсдэлтэй. Тиймээс дотнын хүмүүсээ эрсдэлд оруулахгүйн тулд байгальд зөв зохистой амарч, зугаалахыг зөвлөж байна.
Наймдугаар сард дэлхий дахинд делтавирус 80 гаруй хувийг хамрах тооцоо судалгаа гарсан ба энэ нь өмнөхөөсөө илүү хүндээр нөлөөлдөг, тэр дундаа вакцин хийлгээгүй бол хүнд тусдаг. Тиймээс халвар хамгааллы дэглэмээ баримтлаж, аялаж, зугаалахыг зөвлөж байна" гэв.
Б.Баатар
