Дархан-Уул аймгаас сонгогдсон УИХ-ын гишүүн Г.Дамдинням Зам тээврийн сайд Л.Халтарт Дарханы замтай холбоотой таван асуулт илгээжээ. Тодотговол,

Нэгдүгээрт, Улаанбаатар-Дархан чиглэлийн замын багц 1-2 болон Багц 1-4 ажлын гүйцэтгэгч байгууллагаар шалгарсан “Чайна Стэйт Шинжиан Констакшин Инженеринг групп”-ийг сонгон шалгаруулсан, гэрээ байгуулсан үйл явц болон 2019 оны зургаадугаар сарын 14-ний өдөр байгуулсан гэрээнд хийсэн эрх зүйн дүгнэлт, мөн хуулийн хяналтын байгууллагаар шалгаруулсан бол энэ талаарх мэдээлэл, шалгаруулаагүй бол яагаад энэ талаар ажиллаагүй байгаа талаар,

Хоёрдугаарт, Тус замын АХБ-ны зээлийн санхүүжилттэй урсгалын Багц 1-2, Багц 1-4 дугаар ажлын гацаанаас гаргаж эхлүүлэх, барьж дуусгахаар ямар ажил төлөвлөн хэрэгжүүлж байгаа талаар,

Гуравдугаарт, БНХАУ-ын “Чайна стэйт Шинжиан констракшн инженеринг групп”-тэй байгуулсан гэрээг Монгол Улсад хохирол багатайгаар цуцлах, АХБ болон бусад оролцогч талуудтай зам барилгын ажлыг эхлүүлэх талаар хамтран хийж байгаа ажлууд түүнчлэн шинээр гүйцэтгэгч байгууллагыг сонгон шалгаруулах ажлын явцын талаар,

Дөрөвдүгээрт, Туслах, түр зам нь эвдрэл ихтэйгээс осол аваар ихээр гарч, иргэд амь нас, эрүүл мэнд, эд хөрөнгөөр хохирч байгаа тухай гомдол, санал тасралтгүй ирсээр байгааг анхаарч, засварын ажлын эвдрэл гарсан тухай бүрд нь хэрхэн гүйцэтгэж байгаа талаар болон замын хөдөлгөөний аюулгүй байдлыг хэрхэн хангаж, ажиллаж байгаа талаар,

Тавдугаарт, Тус замтай холбоотой иргэдийн гомдол, саналыг гүйцэтгэгч компани тус бүрээс болон өөрийн яамны зүгээс хэрхэн шийдвэрлэж байгаа талаар,

Дээрх таван асуултад Л.Халтар сайд хариулт өгсөн ч гишүүн хангалтгүй гэж үзсэн байна. Тиймээс Г.Дамдинням гишүүн дахин дараах таван асуултыг асуужээ.

Тэрбээр “Зам тээврийн сайд Л. Халтарт ДАРХАНЫ ЗАМ-аар маш тодорхой 5 АСУУЛТ илгээсэн. Удаан хүлээлгэсэн ч ахиад л бултаж булзааруулсан, бүрэн дүүрэн бус хариултууд иржээ. Дахин лавлах, тодруулах зүйлс их байна. Асуудалд ингэж хандмааргүй байна, сайдаа

Гол асуулт, Дарханы замыг таг гацаасан 2,4-р багцын “Чайна стэйт Шинжиан Констракшн Инженеринг Групп” гэх компани. Гэрээг нь цуцалсан ч зөвлөх багийн гаргасан дүгнэлт, хэмжилтийг хүлээн зөвшөөрөхгүй одоо хүртэл Монгол Улсыг хохироосоор байгаа энэ компанийг хэн, хэзээ, хэрхэн тендерт шалгаруулсныг шалгуулах ёстой. Энэ бол Монгол Улсын буцааж төлөх нөхцөлтэй ЗЭЭЛЭЭР санхүүжигдэж буй төсөл. Гэтэл Сингапурын арбитрт өгч болно, гэхдээ хугацаа алдана гэсэн хачин хариулт өгсөн байх юм.

Хамгийн сонирхолтой нь Монголын талаас хянах боломжгүй гэх хариулт. Гэрээгээр бол Монголын талаас хянан шалгах бүрэн боломжтой. Энэ эрхээ хэрэгжүүлэхээсээ яагаад бултаж, зугтаад байна вэ.

Дараагийн асуулт шинэ гүйцэтгэгчийн тухай. Өмнөх хариуцлагагүй ганц компаниас болоод ажлаа эхлүүлж чадахгүй байгаагийн хариуцлагыг яг хэн хүлээх ёстой вэ? Шинэ тендерт шалгарсан компанийн ажил яг хэзээ эхлэх вэ.

Түр замын эвдрэлээс эд хөрөнгө, эрүүл мэндээрээ хохирсон олон иргэд замын арчлалт засвар, хохирлыг барагдуулах талаар маш их асуудаг. Гэтэл энэ асуултад маань илтэд мушгин гуйвуулсан хариу өгчээ. Замд хохирсон иргэдийн асуултад туслан гүйцэтгэгчдийн төлбөр тооцооны тухай хариулсан байх юм.

Төрийн сайдын албан хариулт ийм дутуу дулимаг, мэдээлэл нягтлаагүй, тоо баримт зөрчилтэй байх нь зөв үү.

Салбарын сайд Та ийм хариуцлагагүй байхад Дарханы зам, Замын-Үүдийн нөхцөл ямар байх нь ойлгомжтой байна.

ДАХИАД АСУУЯ “Чайна стэйт Шинжиан Констракшн Инженеринг Групп” гэх хариуцлагагүй компаниас болоод ДАРХАНЫ ЗАМ яг хэдий хүртэл гацах вэ, хэн, хэрхэн энэ тендерийг тэр компанид өгсөн бэ?

Тодорхой хариулт өгтөл АСУУЛТ-ыг ахин дахин явуулах болно” гэжээ.

Б.Баатар