Замын-Үүдэд өрнөөд буй үйл явдалд нийгмээрээ талархалтай хандаж байна. Ялангуяа Хууль зүйн сайд Зам-Үүдийн мафитай хийх тэмцлээ эхлүүллээ хэмээн мэдэгдсэн нь төр төмөр нүүрээ харуулж эхэллээ. Хожимдсон ч гэлээ зөв, зүйтэй алхам хэмээн хүлээн авагсад олон байна. Гэвч үүнтэй зэрэгцэн Ерөнхий сайдын зарим нэгэн өр зөөлөн шийдвэрийг таашаахгүй хэсэг ч байна. Учир нь, Ерөнхий сайдынхаа нүүрийг улалзуулж, түмний шившиг болгосон МХЕГ-ын дарга Т.Гантулга гэдэг нөхөр байна.

Тэрбээр хүчтэйхэн салхинд хийсээд уначихмаар ноорхой хаалгыг хилийн боомтод босгочихоод, “Ариутгалын хаалга” гэж нэрийдээд хээвнэг зогсож байхад түүнийг нь харсан Ерөнхий сайд нь хүртэл нүүрээ хийх газраа олж ядан, толгойгоо маажиж зогсох вэ дээ. Хаалга буруугүй ч хэн гэгч ямархуу сэтгэлээр ажилдаа хандаж байгаагийн тод илрэл энэ юм.

Ерөнхий сайд Л.Оюун-Эрдэнэ  МХЕГ-ын дарга Т.Гантулгад ажлаа сайжруулж, зөрчлөө арилгах 30 хоног өгсөн. Түүний толгойг илж “хуулийн хугацаа” олгох бус харин ч эсрэгээрээ газар дээр нь хариуцлага тооцоод явах байлаа. Угтаа бол, ганц хаалга ч бус Зам-Үүдэд үүсээд буй олон сарын гацаа, шахааны гол эзэн тэр юм.  

Засаг, загас хоёр толгойноосоо өтдөг гэдэг. Доод, дунд албан тушаалтнуудыг яах вэ. Хамгийн гол нь удирдлагаар хангаж байгаа, төсөв мөнгөний эрх мэдэлтэй, бүхний толгойд суугаа агентлагийн дарга нартаа, ялангуяа МХЕГ-ын дарга Т.Гантулгадаа хариуцлага тооцооч ээ.

Тэрбээр ТӨХ-ны дарга асан Ц.Нанзаддоржтой үгсэн хуйвалдаж, Хүмүүнлэгийн их сургуулийн хувьчлалыг хүртэл будлиантуулж явсан нөхөр. Намынхаа нэр дор аархаж явдаг тэрбээр ажил унагана уу, нураана уу гэхээс босгож, бүтээж явсныг бол мэдэхгүй юм.

У.Тэргэл