Мэргэжлийн сүмо бөхийн холбооны Ёкозунагийн зөвлөл  даваа гаригт хуралдаж, есдүгээр сарын аки башёд түрүүлсэн озэки Харүмафүжид ёкозүна цол хүртээх тухай асуудлыг хэлэлцэж 100 хувийн саналаар дэмжсэн байна. Өнөөдөр Сүмогийн холбооны Удирдах зөвлөл хуралдаж, Харүмафүжи Кохэйг ёкозүна цолтноор батламжлах юм. Ёкозүнагийн зөвлөл нь 20 хүний бүрэлдэхүүнтэй, шийдвэр гаргах төвшинд ажилладаггүй ч нэр хүндтэй аж.

Озэки Харүмафүжи Д.Бямбадорж есдүгээр сарын аки башёд 15 даваа авч, 100 хувийн амжилт үзүүлсэн. Өмнөх нагоё башёд мөн дээрх амжилт үзүүлсэн тэрбээр ийнхүү хоёр башё дараалан 15 даваатай түрүүлж уналгүй давсан даваа нь 31-т хүрээд байгаа. Ингэснээр мэргэжлийн сүмо бөхийн 70 дахь, монголын сүмочдын гурав дахь аварга болж байгаа юм.
Японы сумогийн дэвжээнээ Эзэн хааны цомыг дөрвөнтөө хүртсэн  озэки Харүмафүжи Д.Бямбадорж өдгөө 28 настай.  Тэгэхээр цаашдаа олон жил дайчин уран барилдаанаараа  олныг баясгаж явах нь лавтай.