Монгол Улсын Ерөнхий сайд Эрүүл мэндийн сайд асанд хатуу үг дайж, эрүүл мэндийн салбарыг улстөржүүлэхгүй байхыг хатуу шаардлаа. Эс бөгөөс зохион байгуулж байгаа хүмүүсийн нэрийг зарлаж, хуулийн байгууллагад шилжүүлж, шалгуулна. Цаашлаад ийм зохион байгуулалттай үйл ажиллагааг үргэлжлүүлэн хийвэл Ерөнхий сайдын гүйцэтгэх засаглалын хэм хэмжээнд байгаа эрх мэдлээ хэрэгжүүлэх болно. Нийт иргэдээ хамгаалахын тулд хатуу байх үе ирлээ. Эрүүл мэндийн салбарын хэвийн үйл ажиллагааг доголдуулан, тасалдуулах зорилго яав ч тангараг өргөсөн улстөрч хүнд байх ёсгүй. Тангараг өргөсөн төрийн албан хаагчид бас үүнд автах ёсгүй. Тиймээс эрүүл мэндийн салбартай холбоотой улстөржилтийг таслан зогсоохын тулд Ерөнхий сайд цаашид хатуу арга хэмжээ авна” гэлээ.

Өмнө Ерөнхий сайд вакцины татан авалтад мөн ийм асуудал үүссэн гэдгийг ч санууллаа. УИХ-ын гишүүн С.Одонтуяа нөхрийн хамт вакцины татан авалтал саад учруулах гэж гаалийнханд албан тушаал, эрх мэдлээ ашиглан үүрэг, чиглэл өгсөн гэх мэдээллийг Засгийн тэргүүн хэлж байлаа. Тэр ч үүднээсээ уг асуудлыг шалгуулахаар хууль, хяналтын байгууллагад хандаад байгаа билээ.

Цаашлаад Л.Оюун-Эрдэнэ “Би Ерөнхий сайдын хувьд нэг номерын мэдээлэлтэй хүн. Хөшигний цаана юу болж байгааг мэдрэхийн дээдээр мэдэрнэ шүү. Тусгай албаны мэдээллүүдийг ч авч байгаа” гэв.

Засгийн газрын тэргүүн хэн гэгч улстөрчдөд энэхүү хатуу үгийг дайв. Эрүүл мэндийн сайдаар ажиллаж байсан, улстөрч гэхээр УИХ-ын гишүүн Д.Сарангэрэл болж таарч байна. Тэрбээр сүүлийн үед Эрүүл мэндийн сайд асан Т.Мөнхсайхан, сайд С.Энхболд нар руу дайрч давшилж байгаа. Энэ талаар цахим хуудастаа “Би барагтай зүйлийг тэвчээд өнгөрөөдөг. Энэ удаа зэвүү, дургүй хоёр зэрэг хүрлээ. Т.Мөнхсайханыг залуу хүн ихийг хийнэ гэж бодож эмнэлгийн даргаар томилж улмаар сайд болоход нь сайн үгийг хэлж, дэмжсэн. Тэр нөхөр миний үед бүрэлдсэн коронатай тэмцэх бүх талын бэлэн байдлын ачаар нэг хэсэг барьсан ч дөрвөн сарын дараа тавиад туусан. Сайт, троллуудыг худалдан авч надаас биш өмнөх сайдаас болж корона алдсан гэж баруун солгойгүй бичүүлж уснаас хуурай гарсан даа чааваас. Өөрийгөө мөнгө төлж магтуулж байхын оронд зуны дөрвөн сар үргэлжлүүлж бэлтгэлээ хангах байсан юм шүү дээ. Яамны мэргэжлийн хүмүүсийг халж солиход бүх цагаа барсныг бүгд мэднэ.

Ерөнхий сайд ч тухайн үед анхааруулга өгч байсан. Би 2020 оны долоодугаар сарын 9-нд ажлаа өгсөн. Одоо яг нэг жил болж байна. Жил өнгөрсөн байхад ч тэр дутуу хүтүүгээ хангаагүй болж таарлаа. Шууд.мн сайт дээр өнөөдөр коронагийн одоогийн нөхцөл байдлыг Сарангэрэлээс болсон мэтээр захиалгат нийтлэл гарчээ. Бичсэн, бичүүлсэн аль аль нь ичээсэй. Ковидыг 10 сар барьж вакцинтай ойртуулсан гавъяа та нарынх биш надтай ажиллаж байсан багийнх юм шүү. Залуу улсууд албан тушаал алдахаас айгаа биз гээд жил гаруй дуугүй явлаа. Давардаг юм байна. Төрийн алба залгамж чанартай учраас би тэгсэн, миний үед хийсэн юм гэж ярьдаггүй. Өнөөдрийг хүртэл намайг эрүүл мэндийн сайдаар ажиллаж байсан үед авч хадгалсан эм тариа, хамгаалах хэрэгсэл, тоног төхөөрөмжөөр торгоож байгаа нь бодит үнэн. Эрүүл мэндийн салбар нэг ч уушиг орлуулагч ЭКМО аппаратгүй байсан. Уушиг орлуулагчаа ч, амьсгалын аппаратаа ч , эм тариагаа ч бүгдийг нь бэлдсэн. Үүнийг үнэлдэг, мэддэг нь дийлэнх нь. Тэд чимээгүй ажлаа хийж байгаа. Ноцтой алдаа гаргаад суудал нь ганхаад ирэхээр бусад руу чихдэг арга чинь одоо явахгүй шүү залуус аа хэмээгээд үргэлжлэл бийг сануулсан юм.

Үүнээс харахад Эрүүл мэндийн сайд асан Т.Мөнхсайхан, одоогийн сайд С.Энхболд нар руу чиглэж байгаа нь тодорхой байна. Сайд асан Т.Мөнхсайханы нэрийг тодорхой цохсон бол суудал нь ганхаад ирэхээр бусад руу буруугаа чихлээ хэмээн С.Энхболд сайд руу ч давшилж нэг үзсэн юм.  Төрийн их хатан ийнхүү уурсч, харин Засгийн газрын тэргүүн түүнд хатуухан анхааруулга, сануулга өглөө.

У.Тэргэл