Эрүүл мэндийн салбарынхан цалингаа хоёр дахин нэмэгдүүлэх шаардлага тавьж, Төв талбай дээр жагсаал зохион байгуулсан. Эмч, эмнэлгийн ажилтануудын дээрх шаардлага өндөрийг авч, Ерөнхий сайд Л.Оюун-Эрдэнэ салбарын сайдыг нь энэ учрыг олох үүрэг өгсөн гэгдэж байсан билээ.

Тиймээс ч Эрүүл мэндийн сайд С.Энхболд эмч, ажилчдын төлөөлөлтэй уулзаж, эмнэлгүүдийн удирдлагуудад ажилчдынхаа цалинг нэмэх чиглэл өгсөн. Энэ дагуу ч зарим эмнэлгийн удирдлагууд цалингаа нэмж байгаа талаараа мэдэгдэж байсан бол ЭХЭМҮТ-ийн Ерөнхий захирал Ш.Энхтөр цахим хуудсаараа дамжуулан нэгэн мэдээлэл, тодруулга хийсэн юм.

Тэрбээр "ЯАРАЛТАЙ ТОДРУУЛГА: Эмнэлгүүдийн засаглалын зарчим, нөхцөл байдал ЯЛГААТАЙ шүү!!!!!

1. Эмнэлгийн засаглалыг сайжруулах туршилтын төсөл хэрэгжсэн, ЭМЯ-ны зүгээс бодлоготойгоор бэлдсэн 3 эмнэлэг байгаа. Үүнд: УГТЭ, УНТЭ, АӨСҮТ.

2. Төлөөлөн Удирдах Зөвлөл нь байгуулагдсан.

Санхүүгийн ба Хүний нөөцийн эрхтэй. Үндсэндээ Яамнаас хамааралгүй.

3. ЭХЭМҮТ зэрэг онцгой тусламж үзүүлдэг зарим эмнэлгүүдэд ийм эрх мэдэл байхгүй шүү!!!

ЭХЭМҮТ-ийн тусламж үйлчилгээний онцлог ба эмзэг байдлаас хамаараад манай эмнэлэгт ТУЗ байгуулж, хагас бие даасан байдалд шилжүүлэх үйл ажиллагаа 2022 онд зохион байгуулагдана гэж ЭМЯ-ны төлөвлөгөөнд орсон байгаа. Хагас бие даасан байдалд шилжүүлэх эсэх нь төр эрх мэдлийнхээ хүрээнд шийдэх асуудал. Эмнэлгийн удирдлагын хүслээр болдог асуудал огт биш!!!

Энэ цаг үед, ялангуяа, Засгийн газрын тогтоолоор баталдаг үндсэн цалинг өөрчлөх эрх байхгүй бөгөөд энэ бол асар том зөрчилд тооцогддог!!! Гүйцэтгэлээр санхүүжүүлэх тогтолцоо бол сонгодог утгаараа тэс өөр!!!

"Гүйцэтгэлээр санхүүжих" + "Эмнэлгийн хагас бие даасан байдал" хоёрыг ЭМЯ-ны зүгээс бодлогоор, төлөвлөгөөтэй хэрэгжүүлсэн УГТЭ мэтийн газруудад бол бүрэн боломж бий. Нөгөө талаар Ковидын нөлөө эмнэлгийн тусламж үйлчилгээнд нөлөөлснөөс дээрх 2 механизмын дөнгөж 1 нь л хэрэгжих гэж зовж яваа энэ үед дийлэнх эмнэлгүүд бие дааж цалингаа нэмэх боломжгүй!!!

Болох байсан бол би аль эрт хэрэгжүүлчих байсан. Буруу ярьж байвал шийтгэлээ хүлээхэд бэлэн. 

ЭХЭМҮТ-ийн Ерөнхий захирал Ш.ЭНХТӨР" хэмээсэн байв.

Тэгвэл энэхүү мэдэгдэл гарснаас хоёр хоногийн дараа түүнийг үүрэгт ажлаасаа чөлөөлөгдөх хүсэлтээ өгсөн гэх мэдээллийг Эрүүл мэндийн яамнаас өгөв.

Харин чухам яагаад ийнхүү гэнэт ажлаасаа чөлөөлөгдөх хүсэлтээ гаргах болов гэдэг нь олны анхаарлыг татаж байгаа юм.

Зарим эх сурвалжийн мэдээлж буйгаар Ш.Энхтөр захирлын дээрх мэдэгдэл нь ажлаасаа чөлөөлөгдөх шалтгаан болсон гэх. Салбарын сайдынхаа өгсөн чиглэлийг боломжгүй гэж мэдэгдсэн ч түүнийг шахалтад оруулж, ажлаасаа чөлөөлөгдөхөд хүргэсэн байхыг үгүйсгэхгүй юм. 

Б.Баатар