Сүхбаатар дүүргийн шүүхээс хоригдох ял сонссон МАХН-ын дарга Н.Энхбаяр, Д.Чулуунбаатар, Д.Дуламсүрэн, Ж.Мягмаржаргал нарын гаргасан гомдлыг өчигдөр Нийслэлийн шүүхийн Эрүүгийн танхимд хэлэлцэж, ялыг хэвээр баталсан. Энэ талаар өнөөдөр Нийслэлийн шүүхээс мэдээлэл хийлээ.Анхан шатны шүүхээс МАХН-ын дарга Н.Энхбаярыг дангаар болон бусадтай бүлэглэн төрийн албан тушаалтан албаны эрх мэдэл буюу албан тушаалын байдлаа урвуулан ашиглаж аж ахуйн нэгж байгууллагад онц их хэмжээний хохирол учруулсан, онц их хэмжээний хөрөнгө завшсан гэмт хэрэг үйлдсэн гэм буруутайд тус тус тооцож, Эрүүгийн хуулийн 150.3, 263.2 дахь хэсэгт зааснаар нийт Н.Энхбаярт 25 сая төгрөгийн эд хөрөнгийг хурааж, дөрвөн жилийн хорих ялаар шийтгэсэн.
Харин Д.Чулуунбаатарыг бусадтай бүлэглэн бусдын эд хөрөнгийг завшиж, бусдад онц их хэмжээний хохирол учруулсан гэмт хэрэг үйлдсэн гэм буруутайд тооцож, Эрүүгийн хуулийн 150 дугаар зүйлийн 150.3-т зааснаар нийт арван сая төгрөгийн эд хөрөнгийг хурааж, хоёр жил, 1 сарын хорих ял, Ж.Мягмаржаргалыг бусадтай бүлэглэн бусдын эд хөрөнгийг завшиж, бусдад онц их хэмжээний хохирол учруулсан мөн давтан үйлдлээр мөрийтэй тоглоом тоглосон гэмт хэрэг үйлдсэн гэм буруутайд тус тус тооцож Эрүүүгийн хуулийн 150 дугаар зүйлийн 150.3, 243 дугаар зүйлийн 243.2-т зааснаар нийт 25 сая төгрөгийн эд хөрөнгийг хурааж, гурван жил, 6 сарын хорих ял оногдуулсан юм. Харин Д.Дуламсүрэнг бусадтай бүлэглэн төрийн албан тушаалтан албаны эрх мэдэл буюу албан тушаалын байдлаа урвуулан ашиглаж аж ахуйн нэгж байгууллагад онц их хэмжээний хохирол учруулсан, онц их хэмжээний хөрөнгө завшсан гэмт хэрэг үйлдсэн гэм буруутайд тус тус тооцож Эрүүүгийн хуулийн 150 дугаар зүйлийн 150.3, 263 дугаар зүйлийн 263.2 дахь хэсэгт зааснаар ял оногдуулсан ч 2009 оны Өршөөлийн тухай хуулийн 4.1.2, 4.4 -т заасны дагуу түүнд оногдуулсан үндсэн болон нэмэгдэл ялыг бүхэлд нь өршөөн хэлтрүүлсэн билээ. Мөн Иргэний хуульд заасны дагуу Н.Энхбаяраас 54 сая 534 мянга 302 төгрөгийг гаргуулан Гандантэгчиглэн хийдэд, мөн Н.Энхбаяр, Ж.Мягмаржаргал нараас тус бүр 982 сая 577 мянга 024 төгрөгийг гаргуулан Эрдэнэт үйлдвэрт олгон, “ТВ9” телевизийн хууль бусаар олсон эд хөрөнгийг хурааж улсын орлогод оруулахаар шийдвэрлэжээ.
Уг шийтгэх тогтоолд ялтан болон тэдгээрийн өмгөөлөгч нарын гаргасан давж заалдах гомдлоор Нийслэлийн шүүх өчигдөр давж заалдах шатны шүүх хуралдаанаар хянан хэлэлцэж дараах байдлаар шийдвэрлэсэн байна.
Н.Энхбаяр, Д.Чулуунбаатар, Д.Дуламсүрэн, Ж.Мягмаржаргал нарын гэм буруу нь хэрэгт цугларсан нотлох баримтуудаар тогтоогдсон, хэргийн талаар шүүх тогтоол гаргахад чухал ач холбогдолтой байж болох бүхий л байдлыг бүрэн шалгаж тогтоосон, Эрүүгийн хуулийг зөв хэрэглэсэн, гэм буруугийн талаар хийсэн дүгнэлт хэргийн жинхэнэ байдалтай нийцсэн, анхан шатны шүүхийн шийдвэр хууль ёсны бөгөөд үндэслэл бүхий гарсан байна гэж дүгнэжээ.
Харин шийтгэх тогтоолын тогтоох хэсэгт “ТВ9” телевизийн хууль бусаар олсон орлогыг хураана гэж ерөнхийлөн заасныг өөрчилж, “ТҮ9 телевизийн хууль бусаар олсон 119 сая 534 мянга 302 төгрөгийн эд хөрөнгийг хураасугай” гэж өөрчилж,
Мөн Өргөө зочид буудалтай холбоотой үйлдэлд нь анхан шатны шүүхээс гэм буруутайд тооцож ял шийтгэсэн боловч уг үйлдэлтэй холбоотой Нийслэлийн Иргэдийн Төлөөлөгчдийн Хурлын тэргүүлэгчдийн тогтоол болон Нийслэлийн Засаг даргын захирамжийг хүчингүй болгоогүй нь буруу болсон байна гэж үзэн
Нийслэлийн Иргэдийн Төлөөлөгчдийн Хурлын тэргүүлэгчдийн 2007 оны 10 дугаар сарын 17-ны өдрийн 188 дугаар тогтоол, Нийслэлийн Засаг даргын 2007 оны 11 дүгээр сарын 07-ны өдрийн 555 дугаар захирамжийг тус тус хүчингүй болгох тухай заалтыг нэмж оруулан шийтгэх тогтоолын бусад заалтыг хэвээр үлдээж, ялтан болон тэдгээрийн өмгөөлөгчдийн гаргасан давж заалдах гомдлыг хэрэгсэхгүй болголоо.
Б.Чимэг
