Монгол Улсын Ерөнхий сайд Л.Оюун-Эрдэнийн Засгийн газар авлигыг бууруулахад манлайлал үзүүлж ажиллахаа мэдэгдэн энэ дагуу Ажлын хэсэг байгуулж, бүрэлдэхүүнд нь салбар салбарын төлөөлөл болох 15 хүнийг оруулахаар болсон. Тэгвэл уг Ажлын хэсэг бүрэлдэхүүнд нь орох төлөөллийг сонгож шалгаруулж эхэлжээ.

Ажлын хэсгийнхний хамгийн том зорилго бол авлигын индексээр Монгол Улс 180 улсаас 111 дүгээрт орж буйг хоёр оронтой тоонд оруулах юм. Ядаж л гурван тоогоор урагшлуулж, 99 дүгээр байрт оруулах шаардлагатай болно. Харин үүний тулд Ерөнхий сайд авлигад нэр нь холбогдсон намынхаа гишүүд, журмын нөхөдтэйгээ хатуу тэмцэхээр болж байна.

Үүний гар, хөл нь Хууль зүй, дотоод хэргийн сайд Х.Нямбаатар юм. Үүнээс үүдэн Авлигатай тэмцэх газар байх шаардлагатай юү. Тухайн байгууллагаас тохой илүү эрх мэдэлтэй Ажлын хэсгийнхэн “өнгөтэй, өөдтэй”-г нь шүүрэн  авч, АТГ байнга шүүмжлүүлж ирсэн жараахай мэтээр “амьдрах уу”.

2015 онд Авлигатай тэмцэх газрыг татан буулгах тухай нэлээн ширүүн яригдаж байлаа. Мөн 2021 оны зургаадугаар сард Авлигын эсрэг хуульд нэмэлт өөрчлөлт оруулах хуулийн төслийг хэлэлцэх үеэр УИХ-ын гишүүд ч Авлигатай тэмцэх газрыг төрийн өндөр албан тушаалтнуудын хөрөнгө, орлогын мэдүүлгийг хянадаг, соён гэгээрүүлдэг талын ажлаа түлхүү дагнан хийвэл ямар вэ гэх байр сууриа ч давамгай илэрхийлж байсан юм.  

Өмнө нь ч Ерөнхий сайд асан У.Хүрэлсүх авлига, албан тушаалын хэргийг шалгадаг бие даасан байгууллага байсаар атал өөрийн авсан мэдээлэлд тулгуурлан Тагнуулын байгууллагыг хөдөлгөж, Тост, Тосон бумбад десант буулгаж байв.

Энэ талаар Ерөнхий сайд асан У.Хүрэлсүх “Ашигт малтмалын газартай Тост, Тосон бумбад ашигт малтмал олборлож буй газрын лицензийг цуцлах үүргийг Байгальт орчны сайдад өглөө шүү. Машин, техникийг нь журамла. Цагдаагийн дарга газар дээр нь очиж ажилла. Ард түмэнд хээл хахууль өгөх гээд байгаа асуудлаар Тагнуулын ерөнхий газрын дарга хэрэг үүсгэж шалга. Хэрэв энэ ажлыг хийж чадахгүй бол сайд нар, албан тушаалтнууд ажлаа өг” хэмээж байсан билээ. Авлига, хээл хахуулийн хэргийг Тагнуулын байгууллага нь шалгачих юм бол АТГ-ыг татвар төлөгчдийн мөнгөөр тэжээх хэрэг байна уу гэх шүүмжлэл тухайн үед дэгдэж байв. 

Харин энэ удаад Л.Оюун-Эрдэнэ өмнөх Ерөнхий сайдын жишгийг дагаж, Авлигатай тэмцэх газрыг алсуур үгүйсгэж эхлэв үү. Хоёр жилийн богинохон хугацаанд авлига, албан тушаалын хэрэгтэй Засгийн газрын дэргэд байгуулсан Ажлын хэсгийнхэн эрчимтэй тэмцэж, харин Авлигатай тэмцэх газар хөрөнгө, орлого, соён гэгээрүүлэх ажил төдийхөнтэй “зууралдаж” суух нь гэсэн хуулийнхны таамаг үнэний ортой бололтой. 

У.Тэргэл