УИХ-ын гишүүдээс энэ жилийн хувьд хөрөнгө, орлогоороо тэргүүлсэн эрхмүүд  бүгд тодорхой салбарт бизнес эрхэлж байсан түүхтэй. Хөрөнгө, орлогоороо эхний аравт жагсаж буй гишүүдэд УИХ-ын гишүүн, Боловсрол, шинжлэх ухааны сайд Л.Энх-Амгалан, УИХ-ын гишүүн, Шадар сайд С.Амарсайхан, гишүүн Ц.Мөнх-Оргил, Ш.Адьшаа, Б.Дэлгэрсайхан, Ж.Ганбаатар, Ц.Анандбазар, О.Цогтгэрэл нар орж байна.

Тодруулбал, Л.Энх-Амгалан гишүүн “Эм Си Эс” группыг 1995 онд үүсгэн байгуулж, “Юнител”, “Эм Си Эс электроникс”, “IT Zone” “Эм Си Эс ком”, “Юнивишн” охин компаниудын Захирлуудын зөвлөлийн даргаар ажиллаж байсан. Шадар сайд С.Амарсайхан “Оюуны ундраа” группээр овоглож ирсэн ба тус компани барилга байгууламж, техник, технологи, үйлчилгээний салбарт амжилттай яваа. УИХ-ын гишүүн Ш.Адьшаа олон жил хувиараа бизнес эрхэлж ирсэн ба өдгөө “Улаанбаатар мед” эмнэлгийн ТУЗ-ийн даргын албыг давхар хашдаг.

"Оргил”-ын нэрээрээ танигдсан УИХ-ын гишүүн Ж.Ганбаатар “Оргил” худалдааны төвөө анх III, IV  хороололд байгуулж, улмаар өргөжин тэлсээр өдгөө олон арван салбартай болж, дээр нь барилгын бизнест хүч сорьж буй. Б.Дэлгэрсайхан гишүүний хувьд уул уурхайн бизнест олон жил зүтгэсэн нэгэн. Ц.Анандбазар гишүүний хувьд “Сод монгол” группийг үүсгэн байгуулагч тэрбээр шатахуун импортолдгоороо Монголдоо л монопол. Мөн Монголын үндэсний үйлдвэрлэлд тэргүүлэгч компани болох “Тэсо”-г үүсгэн байгуулагч УИХ-ын гишүүн О.Цогтгэрэл УИХ-ын гишүүдээс хөрөнгө, орлогоороо эхний аравт жагсаж байна.  Зарим нэгийнх нь хөрөнгө, орлогыг онцлон товч танилцуулъя.

Боловсрол, шинжлэх ухааны сайд Л.Энх-Амгалан: 2020 онд 8.3 тэрбум, гэр бүл нь 281 мянган төгрөгийн орлого олжээ. Тэрбумаар үнэлэгдэх орон сууц, барилга байгууламжтай. 1.6 тэрбумын үнэт эдлэл, 300 саяын тээврийн хэрэгсэл, 673 саяын хадгаламжтай, 100 саяын зээлтэй, 10.5 тэрбумын авлагатай хэмээн мэдүүлжээ.

Шадар сайд С.Амарсайхан: Тэрбээр 1.8 тэрбум, гэр бүл нь 73 сая төгрөгийн орлоготой, Мөн 10.7 тэрбумаар үнэлэгдэх орон сууц, үл хөдлөх хөрөнгөтэй, 202 саяын автомашинтай, 225 саяын үнэт эдлэлтэй, 100 саяын зээлтэй, гурван тэрбумын авлагатай.

УИХ-ын гишүүн Ц.Мөнх-Оргил: Тэрбээр өөрөө  35 сая, гэр бүл нь 4.8 тэрбумын орлого 2020 онд олжээ. Нэг тэрбумын орон сууцтай, 6.4 тэрбумын хадгаламжтай, хоёр тэрбумын авлагатай, 410 саяын зээлтэй.

УИХ-ын гишүүн Ш.Адьшаа:  2020 онд тэрбээр 4.5 тэрбум, гэр бүл нь 1.6 тэрбумын орлого олжээ. 4.2 тэрбумаар үнэлэгдэх орон сууц, үл хөдлөх хөрөнгөтэй, 952 саяар үнэлэгдэх автомашинтай, 816 саяын малтай, 890 саяын үнэт эдлэлтэй, 1.3 тэрбумын хадгаламжтай,105 саяын зээлтэй хэмээн тус тус мэдүүлжээ.

У.Тэргэл