Монгол Улсын Ерөнхийлөгч У.Хүрэлсүх Ерөнхий сайдаар ажиллаж байхдаа цар тахал, иргэдийн амьжиргаатай холбоотой зоримог шийдвэрүүдийг гаргаж, олны талархлыг хүлээж байв. Гэвч өвлийн дүн хүйтнээр дөнгөж нярайлсан эхийг хүүхдийнх нь хамт нөмгөн авч гарсанд нийгмээрээ бухимдахад хариуцлагаа хүлээн У.Хүрэлсүхийн Засгийн газар танхимаараа огцорч байлаа.

Харин энэ нь эцэстээ холыг харсан улс төрийн хонжоо байсныг монголчууд хожмоо ойлгосон билээ. Хариуцлага хүлээсэн нэртэйгээр Засгийн газрын тэргүүний ажлаа өгснөөс хойш сураг алдраад байсан тэрбээр Ерөнхийлөгчийн сонгууль дөхөх тусам үйл хөдөлгөөн нь идэвхжиж, бага багаар барьцаа ахиулсаар нэг л өдөр МАН-аас өрсөлдөхөө мэдэгдсэн.

Үнэндээ түүнтэй өрсөлдөх хэмжээний даацтай өрсөлдөгч бусад нам, эвслээс байгаагүй учир ганцаар торойн гарч ирсэн. Тэрбээр монголчуудын итгэлийг хүлээн үнэмлэхүй ялалт байгуулан, Монгол Улсын Ерөнхийлөгч гэх эрхэм алдрыг хүртсэн билээ.  Энэ цагаас хойш мөн л нам гүмхэн байсаар Монгол Улсын Ерөнхийлөгчийн тангараг өргөх ёслолд сүр дуулиантайхан оролцсоноос хойш өнөөг хүртэл мөн бараагаа ч харуулж, сургаа ч дуулгасангүй.

Улс, эх оронд нь коронавирусний хамгийн аюултай ”Дельта” хувилбар тархаж, хүмүүс олноороо нас барж, хөдөө орон нутагт халдварын тохиолдол хоёр дахин нэмэгдэж, цар тахлын улмаас ард, иргэдийн амьдрал туйлдаж байхад санасандаа хүрсэн У.Хүрэлсүх таг чиг.

Тангаргаа өргөснийхөө хэдхэн цагийн дараа ҮАБЗ-ийг хуралдуулан  сүржигнэсэн түүнийг “Ерөнхийлөгч маань асуудлыг эхнээс нь шуурхай шийдэж эхлэх нь. Тангараг өргөнгүүтээ ажилдаа ханцуй шамлан орлоо доо” хэмээн сонголтдоо баярлаж суусан ард олон өнөөдөр Монгол Улс Ерөнхийлөгчтэй билүү ч гэж эргэлзэхэд хүрээд сууж байна. Харин тэрбээр сонгуулийн нөр их ажлын дараах алжаалаа тайлж, баяр хүргэж, алга ташсан хүмүүсийн “пялдага” үгэнд пологдсон шигээ амарч яваа бололтой.

У.Тэргэл