Өнгөрсөн оны зургадугаар сард эхнэр хүүхдээ барьцаалж, хадам эхийгээ хөнөөн, хадам аав, эмэг эх, эхнэрийнхээ дүү нарыг гэмтээсэн Д.Энхээд өнгөрсөн долдугаар сард Чингэлтэй дүүргийн шүүхээс дахин цаазын ял оноосон. Гэвч тэрээр анхан шатны шийдвэрийг хүлээн зөвшөөрөхгүй давж заалдах шатны шүүхэд хандсан ч ялыг дахин хэвээр батлав. Түүнд өнгөрсөн оны арваннэгдүгээр сард Чингэлтэй дүүргийн шүүхээс цаазын ял оноосон ч тэрээр шүүхийн шийдвэрийг эсэргүүцэн давж заалдах шатны шүүхэд гомдол гаргасан.
Уг гомдлыг Нийслэлийн шүүхэд хэлэлцэж, анхан шатны шүүхийн шийдвэрийг хэвээр баталсан. Тиймээс тэрээр Улсын дээд шүүхийн хяналтын шатны шүүхэд хандаж, Улсын дээд шүүхээс нэмж шалгах хэд хэдэн зүйл бий гэсэн үндэслэлээр нэмэлт мөрдөн байцаалтад буцааж байсан. Гэвч хоёр шатны шүүхээс дахин цаазын ял оноолоо.
Түүнийг Эрүүгийн тухай тусгай хуулийн 91.2.3, 91.2.6, 91.2.8, 91.2.12, 91.2.15, 91.2.16, 153.1, 112.2.5, 112.2.6, 112.7, 112.2.8, 147.2 гэсэн 12 зүйл ангиар буруутган, цаазын ял оноогоод байгаа юм.
Тэрээр өнгөрсөн оны зургадугаар сарын 29-30-нд шилжих шөнө Чингэлтэй дүүргийн 19 дүгээр хорооны Тахилтад хадам ээжээ хөнөөж, эхнэр хүүхдээ барьцаалан, хадам аав, эмэг эх, эхнэрийнхээ дүү нарыг гэмтээсэн билээ. Мөн хадам эцэг Б, түүний хүү Ц, эмэг эх 85 настай Б нарыг мэсээр хүнд, хөнгөн гэмтээсэн. Түүнчлэн эхнэр, дөрвөн настай охин, эхнэрийнхээ дүүг барьцаалж, аминд нь заналхийлсэн хэрэг үйлдсэн юм.
Б.Чимэг
