УИХ-ын гишүүн Б.Пүрэвдорж нар АН-ын Онц их хурлыг хуралдуулах үүднээс тус намын 100 мянган гишүүний гарын үсэг цуглуулах санаачилга дэвшүүлсэн талаар бид өмнө нь мэдээлж байсан. Үүнтэй холбоотой асуудлаар мэдээлэл өглөө.

Тэрбээр “Эв нэгдэлтэй АН санаачилгын хүрээнд намаа нэг дарга, тамгатай болгох зорилгоор Онц их хурлыг хуралдуулахыг шаардаж, 100 мянган гишүүнээс гарын үсэг цуглуулах ажил амжилттай өрнөж байна. Өнөөдрийн байдлаар 50 мянга гаруй гишүүн гарын үсэг зураад байна. Зарим нэг аймагт ковид-ын дэглэмтэй холбоотойгоор зогсонги байдалд орсноос гадна зарим аймаг, дүүрэг дээр дунд шатны хурган дарга нар гарын үсэг зурах үйл явцыг бойкотлож байгаа.

Хоёрдугаарт, аравдугаар сард болох УИХ-ын нөхөн сонгуулийн хугацаа ойртож байна.

Манай нам өнгөрсөн Ерөнхийлөгчийн сонгуулиар хоёр нэр дэвшигчийг Сонгуулийн ерөнхий хороонд бүртгүүлж, улмаар нэг нь нөгөөдөө дэгээ тавих замаар сонгуулиар хариуцлагагүй оролцож тавхан хувийн санал авсан. Энэ нөхцөл байдал УИХ-ын нөхөн сонгуулиар ч давтагдаж болзошгүй байна. Наймдугаар сарын 10-ны өдөр намууд сонгуульд оролцох эсэхээ мэдэгдэж, албан бичиг өгөх ёстой. Гэтэл манай нам эв нэгдлээ одоог хүртэл хангаагүй байгаа учраас дахин хоёр албан бичиг өгөх болчихоод байна. Ингэснээр МАН-ын мэхэнд орно. Тэд үүнийг л хүсэж байгаа.

С.Эрдэнэ МАН-д үйлчлэх замаар намаа хагаралдуулж байна.

Өөрсдийнхөө дотоод асуудлыг өөрсдөө шийдэх болохоос бусад нам шийддэггүй юм. Их хурлаа хуралдуулж, асуудлаа нэг тийш нь болгож, нэг нэр дэвшигч дэвшүүлэх ёстой. Энэ нь АН-ын сэргэлт болох юм. Мөн ирэх сонгуульд амжилттай оролцохын гол цэг болно. Тиймээс дарга нар зохион байгуулалтад орохыг хүсэж байна. Та нарын амбиц хэрээс хэтэрлээ” гэв.

Б.Лхам