Хөдөлмөр, нийгмийн хамгааллын сайд А.Ариунзаяагийн  өөрийн албан ёсны хуудсаараа хийсэн мэдээлэл нийгмийн анхаарлыг татаад байна. Тодруулбал, тэрбээр “200-гаас дээш малтай, хоёроос дээш автомашин болон байр, хаустай өрхийг хүнс тэжээлийн дэмжлэгээс хасна” гэлээ.

Хүнсний талон авдаг иргэд “Ланд-200” автомашин хөлөглөж ирээд л бараа, бүтээгдэхүүнээ ачаад явдаг тухай бишгүй ярьдаг. Харин энэ нь үнэн гэдгийг салбарынх нь сайд баталлаа. Гэвч цаана нь хүнсний тусламж авах шаардлагатай олон мянган айл, өрх арай ядан амь зууж, өдөр хоногийг өнгөрүүлж байна.

Хөдөлмөр, нийгмийн хамгааллын сайдын хувьд энэ байдлыг цэгцэлж, илүү  хяналттай, хариуцлагатай болгосонд талархах нь зүйтэй ч ар, өврийн хаалгаар хүнсний талоныг боломжит нэгэнд олгосон албан тушаалтнуудын толгойг илээд өнгөрөөмөөргүй санагдана. Үүнд, албан тушаал, эрх мэдлээ ашигласан цаашлаад авлигын сүлжээ ч илрэх учиртай.

Танил тал, ах дүүдээ хүнсний талон өгдөг, бичиг баримтыг хуурамчаар бүрдүүлдэг явдал олон жил байсаар ирснийг салбарынхан нь хүлээн зөвшөөрч байсан. Харин өдгөө энэ асуудлыг цэгцэлсэн ч чинээлэг амьдралтай айл, өрхөд хүнсний дэмжлэг өгөх зөвшөөрөл олгосон албан тушаалтнуудыг хэзээ зарлах вэ, сайд аа.

Өнгөрсөн хугацаанд 200-гаас дээш малтай 839 айл өрх, хоёр болон түүнээс дээш автомашинтай 53 өрх, хоёр орон сууц, хаустай  зургаан өрх хүнсний тусламж дэмжлэгийг сар бүр авч иржээ. Тэднийг бүртгэлээс хассанаар улс сард 68,9 сая, нэг жилд 826,8 сая төгрөгийг хэмнэх тооцоо гарчээ. Ямартай ч, боломжийн амьдралтай ч бусдын хоол руу өнгөлзөж олон жил амьдарсан хүмүүсийг бүртгэлээс хаслаа. Харин одоо хүнсний дэмжлэг хэрэгцээтэй байгаа айл өрхийг олж, жинхэнэ эздэд нь хүргээсэй билээ.

У.Тэргэл