УИХ-ын дарга Г.Занданшатар өнөөдөр Унгар улсын Гадаад хэрэг, худалдааны сайд Петер Сияяарто тэргүүтэй төлөөлөгчидтэй уулзлаа.

Унгар улсыг бид зүүн европ дахь чухал түншээ хэмээн үздэг. Унгар улсад олон монгол залуучууд суралцан, эх орныхоо хөгжилд үнэтэй хувь нэмэр оруулсан сайхан түүх бидэнд бий. Мөн түүх судар сөхвөл уг гарваль угсаа хамаарал туйлын ойр билээ. Тиймээс Унгар улс монголчуудын зүрх, сэтгэлд ойрхон буй.

Эрхэм сайд Петер Сияяарто Монгол Улсад айлчлан ирсэнд талархаж байна. Бид хоёр орны найрамдалт харилцаа болон цаашдын хамтын ажиллагааны талаар санал солилцож, яриа өрнүүллээ.

Цар тахлын энэ үед улс орнууд дотоод нөөц бололцоогоо дайчилсан сорилтуудыг даван туулж байгаа. Унгар улс дотооддоо амьсгалын аппарат үйлдвэрлэж эхэлжээ. Монгол Улсаас ирсэн хүсэлтийн дагуу 30 гаруй ширхэг амьсгалын аппарат бидэнд бэлэглэлээ.

Хоёр улс “Биокомбинат” УТҮГ-ыг шинэчлэх төслийг хамтран хэрэгжүүлж байгаа. Төслийн хүрээнд вирусын гаралтай вакцин үйлдвэрлэл, лабораторийн барилгыг шинээр барьж, өндөр хүчин чадалтай орчин үеийн тоног төхөөрөмжөөр тоноглох юм. Мөн дэд бүтэц, цахилгаан хангамж, инженерийн шугам сулжээний өргөтгөх,боловсон хүчнийг сургаж, дадлагажуулах зэрэг ажлууд хийгдэх бөгөөд төслийн үйл ажиллагааг эрчимжүүлэх чиглэлд анхаарч ажиллахыг ноён Петер Сияяарто хүслээ.

Унгар улсад ажиллаж, амьдарч буй монгол иргэд бүгд вакцинд хамрагдах болсон таатай мэдээг тэрбээр дуулгалаа.

Манай хоёр орон боловсрол, соёл тэр дундаа кино урлагийн чиглэлд хамтран ажиллаж, Бат болон Атила хааны тухай кино хийж байна. Кино бүтээхэд бүх дэмжлэг үзүүлж хамтран ажиллах болно.