Дуучнаас улстөрч болсон Т.Бат-Оргил Засгийн газарт 30 хоногийн хугацаатай шаардлага хүргүүлээд байгаа юм. Энэ хугацаанд тодорхой хариулт өгөхгүй бол тэмцлийн дараагийн хэлбэрт шилжиж, Төв талбайд жагсахаа илэрхийлээд байгаа юм. Түүнийг энэхүү шаардлагатай нь холбоотойгоор хуулийн байгууллагаас дуудсан байна. Т.Бат-Оргил энэ талаараа “Өглөө 08:36-д утас дуугарч Сүхбаатар дүүргийн прокурорын газраас залгаж байна. (Нөгөө Ерөнхий газрын бичиг шөнө нэг юм ирсэн юм байлгүй дээ.) "Таны гомдол Билгүүн прокурорт байгаа юм байна, ирж уулзаарай" гэв. Очлоо. "Прокурор шаардлагаар ажилладаггүй тул та гомдол гаргана уу" гэлээ. Би ч хэллээ. "Би Ерөнхий сайд Л. Оюун-Эрдэнэд улс төрийн шаардлага хүргүүлсэн болохоос прокурорт хувийн асуудлаар гомдол гаргаагүй. Төр, засаг бидний хэдэн зуун иргэний гарын үсэг бүхий албан шаардлагад хариугаа 30 хоногийн дотор өгөх ёстой. Та юу ч гэсэн өөрийн хариугаа бичгээр өг. Би харин хариугаа Ерөнхий сайдаас л авч таарах нь дээ. Доошоо явуулсаар байгаад хорооны даргаас тодорхойлолт авч дуусгах тоглоомыг хүлээн зөвшөөрөхгүй. Төр, засаг иргэдийн шаардлагын дагуу арга хэмжээ авах 30 хоногийн хугацаа нь дуусаж байгааг анхаарна уу" гээд саллаа.
Дахин сануулахад, бидний шаардлага:
1. Монгол Улсын иргэдийг шүүх, прокурорын тогтоолгүй, хууль зөрчин гэрээс нь баривчлах тушаал өгсөн бүхий л албан тушаалтнуудтай хамгийн чанд хариуцлага тооцож, дараа дараагийн удаа ийм даварсан ажиллагаа хийх юм бол ямар үр дагавартай болохыг бүгдэд харуулах,
2. Үндсэн хуулийн дагуу үзэл бодлоо чөлөөтэй илэрхийлэх, тайван цуглах бидний дархан эрх, эрх чөлөөг боомилж, нухчин дарах зорилгоор үүсгэсэн эрүүгийн болон зөрчлийн бүх хэргүүдийг хааж, торгуулиудыг цуцалж, хохироосон иргэн бүрээс албан ёсоор уучлалт гуйх,
Их л энгийн ойлгомжтой шаардлагууд юмсан. Ойлгохгүй хэцүү байвал дахиад л талбай дээрээ гарч учирлая даа. Засгийн газарт шаардлагыг биелүүлэх, эсвэл яагаад биелүүлэх боломжгүй болохыг ҮНДЭСЛЭЛТЭЙ тайлбарласан хариу өгөхөд хоёр хоногийн хугацаа үлдлээ” хэмээжээ.
Сэтгэгдэл (23)