Исламын шашинтай орнууд Израиль улсын тамирчидтай барилдахаар болсон тохиолдолд барилдахаас татгалзаж дэвжээн дээр гарахгүй байх, бэртэлтэй гэж худлаа хэлэх, албаар жиндээ орохгүй байсаар хасагдах гэх мэт үйлдлүүдийг хийсээр ирсэн. Бидний хамгийн сайн мэдэх нэгэн жишээ 2019 оны жүдо бөхийн дэлхийн аварга шалгаруулах тэмцээний шөвгийн дөрөвт тухайн үедээ Исламын Бүгд Найрамдах Иран улсыг төлөөлөн барилддаг байсан Саид Моллаие болон Израиль улсын тамирчин Саги Муки нарын хооронд өрнөж байсан билээ.

Мөн хэдхэн хоногийн өмнө Токиогийн олимпын -73 кг-ийн жинд барилдах байсан Алжир болон Өмнөд Суданы бөхчүүд аль нэг нь ялалт байгуулбал Израилийн бөх Тохар Бутбултай барилдахаар байсан тул хоёул дэвжээнд гаралгүйгээр нутаг буцацгаасан. Энэ нь Алжирын бөхийн хувьд олон улсын тэмцээнийг уг асуудлаас болж орхиж буй хоёр дахь тохиолдол юм. Харин тэдний хийсэн зүйлийг эмэгтэйчүүдийн +78 кг жинд барилддаг Саудын Арабын залуу бөх Тахани Ал-Кахтани эсрэгээр нь хийж Израилийн Раз Хэршкогийн эсрэг барилдсан гэдгийг тийм ч олон хүн анзаараагүй.

Тус барилдаан Израилийн бөхийн ялалтаар өндөрлөсөн бөгөөд барилдаан дууссаны дараа тэд бие биенээ тэврэн эв нэгдлийн бэлэг тэмдэг болгож гараа барилцсан хэвээрээ үзэгчид рүү мэндчилсэн нь Мулсимын шашинтай орнуудын хувьд түүхэн үйл явдал болсон.

Исламын улсууд Израиль улсын эсрэг ийнхүү тэмцдэгийн гол учир нь Палестин улсыг өөрсдийн гэсэн газар нутаг дээрээ Израиль улсаас хараат бус амьдрах хүртэл тэд бүх аргаар тэмцлээ үргэлжлүүлнэ хэмээн мэдэгдэж байжээ.

Гэхдээ АНУ-ын өмнөх ерөнхийлөгч Доналд Трампын хийсэн уулзалтуудын үр дүнд Арабын Нэгдсэн Эмират, Бахрейн, Марокко, Судан зэрэг улсууд уг тэмцлээ зогсоогоод байна. Мөн уг үйл явдлын дараагаар Саудын Араб улсыг уг тэмцлээ зогсоож байгаа гэх цуу ярианууд ихэд тархсан ч худал мэдээлэл гэдэг нь батлагдсан байна.

Б.Жаргал