МАН-ын Бага хурал энэ сарын сүүлчээр болно. Эл хурлаас нийгэм улс, төрийн нөхцөл байдал цааш хэрхэн өрнөх нь тодорхой болох юм. Тэгвэл уг  чухал хурлын өмнө МАН-ынхан дээр дооргүй хөдөлж эхэллээ. Бага хурлаар нөхөн сонгуулийн асуудлыг хэлэлцэх нь зайлшгүй. Мөн Эрдэнэтийн захирлын хувь заяаг ч энэ хурлаар хэлэлцэж магадгүй байна.

Учир нь, саяхан Эрдэнэтийн захирал Х.Бадамсүрэнг сольж, оронд нь Төрийн өмчийн бодлого, зохицуулалтын газрын даргаар ажиллаж буй Б.Цэнгэлээр сэлгээ хийх яриа гарсан билээ.

Энэ нь ч үнэний ортой. МАН-ын Бага хурлын өмнө тус намын фракцууд хоёр талд наадамлахын сацуу далд уулзалт хийж яваа бололтой.

Тодруулбал, Говь-Алтай аймагт Төрийн тахилгат Сутай Хайрханы тахилгад Ерөнхийлөгч У.Хүрэлсүхийн хамт Ерөнхийлөгчийн Тамгын газрын дарга Я.Содбаатар, УИХ-ын гишүүн Ш.Раднаасэд нарын эрхэмүүд очсон байна. Мөн Л.Халтар, А.Ариунзаяа, Ч.Номин, Б.Жавхлан нарын сайдууд ч тэнд бий аж. Тэднийг уул тахилгын наадамд очих замдаа 200 жийп хөлөглөн говийн хөрсийг нэг эргүүлэх шиг болж байна хэмээн иргэдийг бухимдуулаад буй. Гэхдээ тэр олон машины цуваанд чухам хэн явсан нь нийтэд ил болоогүй. Энэ талаар тайлбар хийгээгүй байна.

Ийн Ерөнхийлөгч У.Хүрэлсүхийн фракц Говь-Алтай аймагт “чуулж” буй бол УИХ-ын дарга асан М.Энхболдын “32-ын бүлэг” Сэлэнгэ аймгийн Зүүн бүсийн үндэсний спортын наадмыг угтуулан уулзаж байна.

Тэдэн дунд “Алтай констракш”-ны Х.Бат-Эрдэнэ, УИХ-ын гишүүн Ж.Эрдэнэбат, Эрдэнэтийн захирал Х.Бадамсүрэн, хуульч Л.Гүнбилэг, “Модун Хаан” группийн ерөнхийлөгч Д.Хишигжаргал нарын эрхмүүд ирсэн нь баттай.

М.Энхболдын фракцынхан үүнээс өмнө хоёр ч удаа уулзсан тухай мэдээлэл гарсан бөгөөд нэг нь нам дотроо байр сууриа бэхжүүлж багаа бүрдүүлэх, нөгөө нь нөлөөгөө хадгалах, цаашлаад Эрдэнэт үйлдвэрийн асуудлыг хэрхэх талаар хоёр талд сэм хэлэлцэж байна.

Б.Лхам