Ерөнхийлөгч У.Хүрэлсүхийн уучлал үзүүлсэн анхны хүн нь “хилс хэргээр буртуутгагдсан” гэх Ерөнхий сайд асан М.Энхсайхан юм. Ерөнхийлөгч У.Хүрэлсүх түүнд уучлал үзүүлсэн нь МАН-ын 100 жилийн ойг угтуулан хийж байгаа арга хэмжээний нэг нь гэж зарим учир мэдэх хүмүүс ярьдаг юм.

Түүнчлэн дэлхий нийт цар тахалтай энэ үед Ардын хувьсгалын 100 ойгоор олон мянган хүнийг сулласан бол олон хүний магнай тэнийх байсан талаар Ерөнхий сайд асан С.Баяр бичжээ. Тэрбээр “Хорих 409 ангид очиж, хамт сууж асан хөгшин, залуу хоёрыг эргэв. Өршөөлд багтах олон жилийн найдлага нь талаар болж.

Тун ч гутрангуй байна.

50 жилийн өршөөлөөр монголын шорон хоосорч, олон мянган айлын буян заяа сэргэсэн гэдэг. 100 жилийн ойгоор үүнийгээ давтсан бол зүгээр байж” гэжээ.

Түүний хувьд Ерөнхий сайдаар ажиллаж байхдаа албан тушаалын байдлаа урвуулан ашигласан хэргээр өнгөрсөн жилийн долоодугаар сарын 23-нд анхан шатны шүүхээс 5 жил оноосныг Давж заалдах шатны шүүхээс 2.6 жил болгон бууруулсан бөгөөд өнгөрөгч долоодугаар сард шүүхийн магадлангаар суллагдсан юм.

А.Сүх