“Энержи Ресурс” ХХК өнгөрсөн оны байдлаар дангаараа улсад 850 сая ам.долларын хөрөнгө оруулалт хийсэн. Хөрөнгө оруулалт гэхээр том тоо яриад байдаг. Энэ их хөрөнгийг хаанаас босгож байгаа талаар тэр болгон хүмүүс мэддэггүй. Үүний талаар энгийн ойлголттой байх хэрэгтэй байх. Их хэмжээний ашиг олоод байгаа учраас энэ их хөрөнгө босч байгаа байх гэж ойлгож магадгүй. Тэгвэл энэ нь буруу ойлголт юм. Бид одоогийн ашиг, мөн ирээдүйд олох ашгаа урьдчилан тооцоолж барьцаалан асар их зээл авч хөрөнгө оруулалт хийж байгаа. Бид одоо 600 тэрбум төгрөгийн бонд гаргаж орон нутгийн хөгжил болон “Энержи Ресурс”-т хөрөнгө оруулалт хийж байна.

Уул уурхайг тойрсон ташаа мэдээлэл их явж байна. Уул уурхайн энэ их ашиг хаашаа явж байна, хэний халаасанд ордог вэ гэсэн олон зүйл яригдаж байна. Энэ талаар бид өөрсдөө дүгнэж харсан юм. “Энержи Ресурс”-ийн жишээн дээр авч үзье. Өнөөдрийн байдлаар 850 орчим сая ам.долларын хөрөнгө оруулалт хийсний 50 сая нь цахилгаан станц, 100 орчим сая нь зам, 350 сая ам.доллар нь дэлхийд дээгүүрт бичигдэх баяжуулах үйлдвэр, 50 сая нь усны байгууламж, мөн цэцэрлэг, сурууль, орон сууц барьхад зарцуулсан ба улсад 250 тэрбум төгрөгийн татвар төлсөн байгаа юм. Дээрээс нь Монголын 700 орчим компани манайхаас ажил үйлчилгээ авч уг 850 сая ам.долларыг шингээлцсэн байна. Гэтэл MCS групп болон “Энержи Ресурс”-ын хувьцаа эзэмшигчид одоо болтол нэг төгрөгийн ногдол ашиг аваагүй байгаа.

“Энержи Ресурс” дангаараа IPO хийгээд 700 сая ам.доллар босгосон, саяхан 600 сая ам.долларын бонд гаргаж төмөр зам барих гэж байна. Гэтэл уул уурхайн үйл ажиллагаа эрхэлж байгаа компани ашгаа аваагүй байтал, улс болон бусад дагалдах бизнес хөгжиж байна.