УИХ-ын гишүүн С.Одонтуяа нэр төрөө сэргээлгэхээр Төрийн ордны гадна 60 гаруй хоног суулт зарласан С.Цэвээн гуайтай өнгөрсөн долоо хоногт уулзаж, сувилалд хэвтүүлэхээ мэдэгдсэн. Асуудлыг нарийвчилбал, Цэргийн албанд 27 жил ажиллаад албан үүргээ гүйцэтгэж яваад онгоцны ослоор амиа алдсан нөхрийнх нь ар гэрт юу ч өгөөгүй атал тухайн үеийн ханшаар 700 мянган төгрөгийн тэтгэмж олгосон гэх баримт дэлгэгдэж, улмаар буурай нэр төрөө сэргээлгэхээр ийн суулт хийгээд буй юм. С.Цэвээн гуай булчирхайн хавдартай бөгөөд хугацаанд Төрийн ордны гадна сууснаас болж бие нь муу байгаа юм. Түүнийг ямар сувилалд хэвтэж байгаа болон түүний олон хоног суулт зарласан асуудал шийдэгдсэн эсэх талаар түүний охин С.Урансувдмаагаас тодрууллаа.

-Таны ээжийг сувилалд амраахаар болсон шүү дээ. Хаана амарч байгаа вэ?

-С.Одонтуяа гишүүн Монгол Улсын Цагаатгах ажлыг удирдан зохион байгуулах улсын комиссын даргаар ажилладаг юм байна лээ. Энэ чиг үүргийнхээ хүрээнд ээжтэй хоёр ч удаа уулзсан. Хамгийн сүүлд уулзахдаа сувилалд амраая гэсэн ч ээж амрахгүй гээд амраагүй. Одоо гэртээ байгаа.

-Биеийн байдал нь хэр байгаа вэ?

-Бие нь сайнгүй байна. Ээж маргааш ч үхэж магадгүй байна гээд эмнэлэгт хэвтэхгүй, төр засаг бидний хэлмэгдүүлсэн асуудлыг шийдэх хүртэл хүүхдүүдийнхээ хажууд баймаар байна гэсэн.

Ээж маань булчирхайн хавдратай. Хавдар нь биеэр нь тархчихсан. Уг нь эмчилгээ хийлгэж болох ч ээж эхлээд нэр төрөө сэргээлгэнэ гэсэн. Ашгүй С.Одонтуяа гишүүн энэ асуудлыг нааштай шийдвэрлэхэд дэм болно гэж амласанд талархаж байна.

-Хэдий хугацааны дараа хариу өгье гэсэн бэ?

-Өнгөрсөн долоо хоногт хүлээж авч уулзахдаа 14 хоног түр хүлээгээрэй гэж хэлсэн байна лээ.

-Таны аавыг ослоор өөд болсны дараа төр засгаас хоёр ч удаа мөнгөн тусламж өгсөн талаар баримт байгаа юм байна лээ. Гэтэл энэ мөнгийг ар гэрийнхэн нь аваагүй. Та энэ асуудлыг юу гэж харж байгаа вэ?

-Энэ ээдрээг Засгийн газар л тайлна. Хуулийн байгууллагад удаа дараа хандсан  тусыг олоогүй.

-Энэ асуудал шийдэгдэхгүй бол яах вэ. Ээжийн тань бие муу байдаг?

-Ээж олон жил гүтгүүллээ. Тиймээс тэнгэрт халихаасаа өмнө энэ асуудлыг шийднэ гээд эмнэлэгт ч хэвтэхгүй байгаа. Хэрэв дээрх асуудал шийдэгдэхгүй бол суултаа үргэлжлүүлнэ гэсэн. Ээжийн эмчилгээг хийлгэмээр байдаг. Ээж эмнэлгийн орон дээр үхэхгүй, ядаж нэр төрөө цэвэрлэж аваад явна гээд их хэцүү.

Б.Лхам