Монгол улсад залуучуудын байгууллага үүсэж хөгжсөний 100 жил, Монголын үндэсний бөхийн холбооны 30 жил, Монгол бөхийг дэлхийн дээд амжилт Гиннест бүртгүүлсний 10 жилийн ойд зориулсан бөхийн барилдаан өчигдөр эхэлсэн. Өнөөдөр шийдвэрлэх барилдаанууд болно.

Энэ удаагийн барилдаанд түрүү бөх хэн байх вэ гэдгээс илүү олны хэл ам дагуулаад буй аварга Э.Оюунболд зодоглож байгаа нь анхаарал татаж байна. Тодруулбал, 2019 оны наадмаар түрүүлсэн Э.Оюунболд, өсөх идэр чимэг хүртсэн начин Д.Цэрэнтогтох нараас допинг илэрснийг бүгд мэднэ. Уг асуудалтай холбогдуулан тэдэнд унасан бөхчүүдэд цол нөхөн олгох шийдвэр гарсан ч асуудал аажимдаа бүдгэрч, замхрах тийшээ ороод буй.

Угтаа бол олон улсын дүрмээр авч үзвэл аварга Н.Батсуурь даян чимэг, өөр бусад бөхүүд начин, харцага, заан цолтой болох байв. 

Өмнөх Ерөнхийлөгчийг дээрх асуудлыг нэг тийш шийднэ гэж олон хүн найдаж хүлээсэн ч тэр чадаагүй. Уг нь Э.Оюунболдын цолыг хураах эсэх нь Ерөнхийлөгчийн гарын үзүүрээр л шийдэгдэх асуудал шүү дээ.

Хэрэв Э.Оюунболдын цолыг хураавал Улсын баяр наадмаар сүүлийн хоёр жил допинг хэрэглэсэн бөхчүүдийн асуудал ч хөндөгдөнө. Учир юу гэвэл нутгийнх нь бөх, тодруулбал, Баянхонгор аймгийн бөх Д.Цэрэнтогтохын өсөх идэр чимэг, Б.Бат-Оршихын улсын харцага цолыг хураах нөхцөл үүсэх юм. Мөн барилдах эрх ч үүнд багтана. Энэ шалтгаан Ерөнхийлөгч асан Х.Баттулгыг "тушсан" гэдэг.

Одоо бүх эрх мэдэл Ерөнхийлөгч У.Хүрэлсүхэд бий. Нутгийн дүү гээд хаацайлаад өнгөрөх үү, эсвэл гэдгийг тэр л шийднэ. Тэр тусмаа “шударга ёс” гэж их ярьдаг түүний хувьд хэлсэндээ эзэн нь байж, итгэл хүлээхүйц хүн мөн үү гэдгийг иргэд анхааралтай ажиж сууна. 

Б.Лхам