УИХ-ын гишүүн асан Л.Гүндалай УИХ-ын нөхөн сонгууль болон АН-ын өнөөгийн нөхцөл байдалтай холбоотой өөрийн байр сууриа илэрхийлжээ.

Тэрбээр “Аливаа улс орны хөгжил, компанийн хөгжил, сайн сайхан бол удирдагчаас хамаардаг. Хүчтэй удирдагч улс орныг урагш нь чадварлаг авч явж чаддаг. Үүнтэй адил улс төрийн намд хүчтэй удирдагч зайлшгүй шаардлагатай. Улс төрийн нам ялалтад хүрэхийн тулд иргэдийг манлайлсан, итгэлийг нь авч улс орныг хөгжүүлж чадах удирдагчаар удирдуулж байж сонгуульд ялалт байгуулдаг.

АН-ын хувьд УИХ-ын болон Ерөнхийлөгчийн сонгуульд ялагдлаа. Нэр дэвшүүлсэн хүн нь улс орныг удирдаад явах хэмжээний хүчтэй удирдагч биш учраас.  

Тиймээс ялагдалдаа дүгнэлт хийж, дарга гээд байгаа хүмүүс нь өөрсдөө огцрох ёстой. Хоёрдугаарт, дараагийн удирдагчаа гаргаж ирэх ёстой. Тэр нь М.Тулгат зэрэг хэн ч биш нөхөр байж болохгүй. Тэгвэл дахин ялагдана. Улс төрийн намд хамгийн чухал нь удирдагч байдаг юм. Үүнийг АН-ынхан ойлгохгүй, бүгдээрэ нийлээд сонгуульд орвол болдог, ялдаг юм шиг ямар ч судалгаагүй явж байгааг шүүмжилж байна.

Нөхөн сонгуульд энэ янзаараа ялагдана.

Яаж иргэд итгэх юм. М.Тулгат эсвэл О.Цогтгэрэлд итгэж сонгох юм уу. Тэгдэггүй байхгүй юу. Улс төрийн намыг манлайлагч лидер хүн ялалтад хүргэдэг хуультай. МАН бэхэжсэн, мөнгөтэй, эрх мэдэлтэй болчлоо шүү дээ. Үүний эсрэг ялж чадах, иргэдийг дагуулж чадах зориг, зүрхтэй, шалгарсан аавын хүү удирдаж байж ялна” гэлээ.

А.Сүх