Нүүрс тээврийн замд хашигдан үндсэн нутагтаа эргэж ирэхгүй болсон хулан адууг сэргээн нутагшуулах асуудлыг Өмнөговь аймгийн Байгаль орчин, аялал жуулчлалын газраас  яаманд дэвшүүлэн тавьсан билээ.
    Нүүрс тээврийн замд хашигдан үндсэн нутагтаа эргэж ирэхгүй болсон хулан адууг сэргээн нутагшуулах асуудлыг Өмнөговь аймгийн Байгаль орчин, аялал жуулчлалын газраас  яаманд дэвшүүлэн тавьсан билээ. Энэ асуудлыг яамнаас шийдвэрлэсний дагуу энэ оны дөрөвдүгээр сараас эхлэн мэргэжлийн байгууллагаар судалгаа, аргачлал хийлгэж, үүнд үндэслэн Өмнөговь аймагт үйл ажиллагаа явуулж байгаа уул уурхайн аж ахуйн нэгжүүдийг оролцуулан 9-р сарын 20-23-ны өдрүүдэд нутагшуулах ажлыг зохион байгуулав. Энэ ажлыг “Амьтан асралт” ХХК мэргэжлийн байгууллагын дэмжлэгтэйгээр гүйцэтгэлээ.
     Байгаль орчин, аялал жуулчлалын газар, Говийн бага дархан цаазат газрын хамгаалалтын захиргаа, “Амьтан асралт” ХХК мэргэжлийн байгууллага, Оюу толгой, Энержи ресурс, Хүннү коал, Дун Юань, ЭНК, Таван толгой Транс зэрэг байгууллага, аж ахуйн нэгжийн 30 орчим хүний бүрэлдэхүүнтэй баг ажиллаж, 400 гаруй хулан адууг Гашуун сухайтын чиглэлийн нүүрстээврийн гурван хэсэг замыг гаталган Баян-овоо, Ханбогд сумдын зааг нутаг Дайчингийн говь, Шинэ усны хоолойд гаргаснаар хуучин нутаглаж байсан нутагтаа эргэн ирлээ. Энэ нь манай улсад өмнө хийгдэж байгаагүй ажил юм.
Энэ ажлыг зохион байгуулах үед хулан адуу хуучин байсан нутагтаа нүүдэллэн, тээврийн замуудад тулж ирсэн байсан нь ажлыг гүйцэтгэхэд дөхөмтэй болголоо. Хулан адуу нь хуучин амьдарч байсан нутагтаа сэлгэн нутагшихад олон салаа зам, машины дуу чимээ нөлөөлж байдаг нь судалгааны явцад ажиглагдаж байлаа.
Цаашид тавих олон салаа хатуу хучилттай зам, төмөр замд нүхэн гарц хийн ан амьтныг сэлгэн нүүдэллэх боломж бүрдүүлж өгөх шаардлагатай байна. Мөн хулан адууны нутагт амьдрах орчин, хангамжийг анхаарч, биотехникийн олон талт ажил зохион байгуулах, хүзүүвч зүүн ажиглалт судалгаа хийх хэрэгтэй юм гэж Өмнөговь аймгийн Байгаль орчин, аялал жуулчлалын газрын мэргэжилтэн Ц.Алтанзул мэдээллээ.