УИХ-ын сонгуулийн 18, 28 дугаар тойргийн нөхөн сонгуульд намууд тэр дундаа парламентад суудалтай улс төрийн хүчнүүд ямар хүн нэр дэвшүүлэх вэ гэдэг асуудал олны анхаарлыг татаж байна. Юутай ч намууд нэр дэвшигчдээ тодруулахад үндсэндээ 10 хоногийн хугацаа үлджээ. Үүнээс өмнө намынхаа хурлыг хуралдуулж, эцэслэх юм. Үүнтэй холбоотойгоор нэр дэвших магадлалтай хүмүүсийн нэрс ч яригдаад эхэлсэн.

Эрх баригч МАН-ынхны хувьд нөхөн сонгуулийн өмнө фракц фракцаараа хоёр талд уулзаад амжсан.

Ерөнхийлөгч У.Хүрэлсүх болон УИХ-ын дарга асан М.Энхболдын фракцныхны хувьд ярих нэгдүгээр асуудал нөхөн сонгууль бол дараагийнх нь Эрдэнэтийн даргын суудлыг аль тал нь гартаа атгах вэ гэдэг явдал. Өдгөө тус намд Ерөнхий сайд цаашлаад намын даргынх нь суудал ганхаад эхэлсэн.

Түүнчлэн сөрөг хүчнүүдээс ч огцруулахаар гарын үсэг цуглуулаад эхэлсэн энэ үед Ерөнхий сайдын хувьд байр сууриа хэрхэн хадгалах, ямар тохироо хийх нь чухал. Ялангуяа нам дотор хүчтэй яригдаж байгаа учраас эсрэг фракцныхныхаа саналыг албан тушаалаар авч буй бололтой. Учир нь өчигдөр Хөшигийн хөндийн шинэ нисэх буудлын захирлаар Д.Оюунхоролыг томилсон билээ.

Д.Оюунхорол М.Энхболдын фракцын хүн бөгөөд нөхөн сонгуулийн өмнөх эсвэл нам доторх байр сууриа хадгалахын төлөөх тохироо гэж учир мэдэх хүмүүс үзэж байгаа юм.

Б.Лхам