МАН, МАХН хоёр нэгдсэнээс хойш даруй дөрвөн сарын хугацаа өнгөрчээ. Хоёр нам нэгдэхдээ хэд хэдэн чухал тохироо хийсний нэг нь Үндсэн хуульд нэмэлт, өөрчлөлт хийх нөгөө нь албан тушаалынх гэж ярьдаг. Үндсэн хуульд нэмэлт, өөрчлөлт хийх шалтгааныг зарим улстөрчид Ерөнхийлөгч асан Н.Энхбаяртай холбон үздэг юм. Юу гэвэл, Үндсэн хуулийн өөрчлөлтөөр авлига, албан тушаалын хэргээр өмнө нь ял эдэлж байсан бол улс төрийн сунгаанд нэр дэвших эрхгүй болсон. Үүгээр тэр өнгөрөгч сонгуулиар нэр дэвшиж чадаагүй юм.

Мэдээж МАН-тай нэгдэж улс орныхоо төлөө хүчээ нэгтгэн зүтгэнэ гэж байгаагийн цаана тодорхой эрх ашиг байгаа нь нууц биш. Тэр нь дээрх заалтыг зассанаар Н.Энхбаярын улс төрд эргэн ирэх хүсэл зориг биелэнэ хэмээн хоёр намын нэгдлийн цаад учгийг тайлдаг юм.

Энэ нь ч биелэлээ олж тэрбээр Шадар сайдын гараанаас МАН-ын гэх тодотгол дор улс төрийн карьераа эхлүүлэхээр зэхэж буй гэх.

Тодруубал, түүнийг одоо Шадар сайдын үүргийг гүйцэтгэж байгаа, УИХ-ын гишүүн С.Амарсайханы оронд томилохоор МАН дотор хэлэлцээд эхэлжээ. Мөн хүү Э.Батшугар нь УИХ-ын сонгуулийн Сонгинохайрхан дүүргийн 28 дугаар тойрогт МАН-аас нэр дэвших магадлал өндөр хүнээр нэрлэгдэж байгаа бол тус намын Хэвлэл мэдээлэл, Цахим бодлогын газрын даргаар МАХН-ын Ерөнхий нарийн бичгийн дарга асан Б.Тулга томилогдсон. Энэ мэтчилэн МАН-нд очсон Н.Энхбаярын тойрон хүрээлэгчид шат дараатай албан тушаалд томилогдож, хоёр намын тохироо биелэлээ олж байгаа аж.

Б.Лхам