Богдхан уулын төмөр замын нээлтийн ажиллагаанд Ерөнхий сайд Л.Оюун-Эрдэнэ оролцож байна.

Тэрбээр энэ үеэр “Богдхан уулын төмөр замын бүтээн байгуулалтын ажлыг яаралтай горимоор эхлүүлж, гурван жилийн хугацаанд ашиглалтад оруулж дуусгахаар зорилт дэвшүүллээ. Тус төмөр зам нь дэд бүтцийн болон тээвэр логистикийн өрсөлдөх чадварыг нэмэгдүүлээд зогсохгүй Улаанбаатар хотын төвлөрлийг сааруулах, Төв аймгийн нутаг дэвсгэрт шинэ дагуул хот бий болох үндсэн шийдэл болох юм.

Улаанбаатар хотын анхны ерөнхий төлөвлөгөөгөөр 500 мянган хүн суурьшихаар төлөвлөсөн ч энэ тоо хэд дахин өссөн. Өнөөдөр 500 гаруй мянган тээврийн хэрэгсэл Улаанбаатар хотын авто замын хөдөлгөөнд оролцож байгаа бөгөөд авто замын хүчин чадал 13 км цаг болж, оргил ачааллын үеэрээ 8 км цагийн хурдтай байна.

Нэг үгээр бол, нийслэлийн авто замын ачааллын дундаж хурд явган хүнийхтэй ижил хэмжээнд байна.

Тиймээс хүн амын дийлэнх нь оршдог Улаанбаатарын асуудлыг шийдвэрлэхэд Засгийн газар хамтран ажиллана гэж хэлснийг та бүхэн санаж байгаа байх. Хэлсэн үг, дэвшүүлсэн зорилтоо бодитой болгохын тулд ажлын хэсэг байгуулсан.

Дээрх төмөр зам баригдсанаар эдийн засгийн чөлөөт бүс бий болох цаашлаад Төв аймаг улсын зэрэглэлтэй хот болох боломж бүрдэнэ” гэлээ.

А.Сүх