FM сонсогч залуус LIFE 104.0-ийн хөтлөгч Сантиг "Хадам ээж", "Мамбо", "Сантиг маажих уу" нэвтрүүлгүүдээр нь таньдаг болсон.

Учир нь түүний нэвтрүүлэгт орж ээж, аав, найз нөхдөөрөө тоглуулж байсан хүмүүс нийслэлийн иргэдийн 3/1 хувьд байдаг гэхэд хилсдэхгүй. Ямартай ч радио ертөнцийн шинэ өнгө аясыг нэмж микрофоны араас дуу хоолойгоороо олонд танигдсан нэгэн. Олон охидын зүрхийг эзэмдэгч авьяаслаг хөтлөгч маань ирэх сарын 14-нд тоглолтоо хийхээр болжээ.

Энэ түүний хүсэл мөрөөдлийн нэг төдийгүй Монголд анх удаа радиогийн нэвтрүүлгийг тайзнаас хүргэх юм байна. Хайртай хөтлөгчөө мөрөөдлөө биелүүлэх гэж буйд нь Сантигийн үнэнч сонсогчид баяртай байгаагаа илэрхийлсээр байгаа гэнэ.

Түүний тоглолтод "Хүсэл мөрөөдөл" цомогт нь орсон дуунууд дуулагдах аж. Мөн сонсогч фэнүүд нь Сантигийн үдэшт саатсанаар авьяаслаг хөтлөгчийн бүжиглэж, жүжиглэж, дуулж хөтлөхийг нэгэн зэрэг харах боломжтой юм байна. Ийнхүү фм сонсогчдод дуу хоолойгоороо танигдсан нууцлаг залуу тайзнаа мэндэлж, царайгаа харуулахаар болжээ.

Сонирхуулахад, тэрбээр 2010 оны нэгдүгээр сарын 14-нд анх "LIFE 104.0"-т ажиллаж эхэлсэн бөгөөд 2010, 2011 оны шилдэг хөтлөгч болсон билээ.