Өнгөрсөн УИХ-ын сонгуулиар намууд нэр дэвшигчдийнхээ дийлэнхийг шинэ боловсон хүчнээр сэлбэж, өрсөлдсөн. Үүнийгээ “иргэдийн захиалга” хэмээн нэрийдсэн юм. Эрх баригч намын хувьд ч ялгаагүй энэ дүрмээр ажилласан. Түүнчлэн өмнө нь 33, 32-ын бүлэг болж хоёр хэсэг хуваагдаад байсан асуудлыг халж, М.Энхболдын гэх тодотголт гишүүдэд намаасаа нэр дэвших эрх олгоогүй бөгөөд зарим нэр нөлөө бүхий улстөрчдөд албан тушаал “амласан” гэдэг юм.

Тэгвэл өнгөрсөн сонгуулиар нэр дэвшиж эрх авч чадаагүй гишүүн аснуудаас хэн нь ямар албан тушаалд очсоныг хүргэе.

Тухайлбал, УИХ-ын гишүүн Оюунхорол өнгөрсөн долоо хоногт Хөшигтийн хөнлийн шинэ нисэх буудлын захирагчаар томилогдсон. Түүний хувьд дөрвөн удаа парламентын гишүүнээр сонгогдон ажилласан бөгөөд математикийн багаас Отгонтэнгэр сургуулийн захирал хүртэл дэвшин ажилласан нэгэн. Олноо “унтдаг гишүүн” нэрээр танигдсан.

Д.Оюунхоролыг улсад 1.9 тэрбум гаруй төгрөгийн хохирол учруулсан хэрэгт нэр холбогдож байсан удаатай. Үүгээр зогсохгүй Байгаль орчин, ногоон хөгжил, аялал жуулчлалын сайдаар ажиллаж байх хугацаандаа пентхаус барих нэрээр төрийн албан хаагчдын мөнгийг залилсан хэргээр шалгаж байна гэсэн мэдээлэл өнгөрсөн оны аравдугаар сард гарсан бөгөөд түүнийг хил даван зугтсан гэдэг ч эх орондоо ирэнгүүтээ албан тушаалд томилогдсон нь олон хүний гайхашралыг төрүүлдэг.

Угтаа бол хуулийн өмнө бүгд эрх тэгш байна гээд Үндсэн хуульдаа заасан мөртлөө гэм буруутай эсэхийг нь тогтоох нь бүү хэл нөлөө бүхий эрхмүүдэд албан тушаал хайрладаг нь харамсалтай.

Түүнчлэн УИХ-ын гишүүн асан Н.Амарзаяаг Өмнөговь аймгийн Гашуунсухайт хилийн боомтын Засгийн газрын бүрэн эрхт захиргааны дэд даргаар томилсон нь өнгөрсөн долоо хоногийн чухал томилгооны нэг байлаа. Түүний хувьд физик, математикийн багшаас Өмнөговь аймгийн аймгийн татварын хэлтэс ТУБ, нягтлан бодогч, аймгийн МАН-ын хорооны дэд дарга, даргаас УИХ-ын гишүүн хүртэл дэвшин ажиллаж байсан юм. Тэрбээр олноо “бохь гишүүн” гэдгээр танигдсан нэгэн. Албан тушаалаа ашиглан ЖДҮ-ээс зээл авсан дуулианд холбогдож байсан.

Дараагийнх нь УИХ-ын гишүүн асан О.Батнасан. Түүнийг “Монголын төмөр зам” ТӨХК-ийн Гүйцэтгэх захирлаар томилсон. Тэрбээр багшаас “Кондитер-Улаанбаатар” ХХК-ийн Ерөнхий захирал хүртэл дэвшин ажилласан. УИХ-ын гишүүнээр ажиллаж байхдаа ЖДҮ-ээс зээл авсан асуудалд нэр холбогдож байсан.

Б.Лхам