Булган аймгийн Засаг дарга Б.Ариун-Эрдэнэтэй холбоотой таагүй мэдээлэл үе үе гарч, олныг гайхшруулдаг. Түүнийг орон нутгийн төсвийн мөнгөөр Засаг даргын албаны LAND CRUISER 200 маркийн автомашин авахаар 210 сая төгрөгийн тендер зарласан гэх мэдээлэл нэг хэсэг газар авсан.

Тэгвэл өдгөө түүнийг хүний наймааны хэргээр ял эдлэж байсан найзыгаа төрийн албанд томилсон гэх мэдээлэл ил болов. 

Тодотговол, Булган аймгийн Засаг дарга Б.Ариун-Эрдэнэ нь өөрийн дотны найз Г.Батдэлгэрийг тус аймгийн Нөөцийн газрын даргаар томилжээ. Түүнийг найзыгаа уг албан тушаалд томилсон гэхээс илүүтэйгээр гэмт хэргийн улмаас ял эдлэж байсан хүнийг ийнхүү төрийн албанд томилсон нь олны анхаарлыг татаж байгаа юм. 

Тодруулбал, Гүржавын Батдэлгэр нь Эрүүгийн хуулийн тусгай ангийн 113.3 буюу “Хүн худалдаалах”, 124.2 буюу “Биеэ үнэлэхэд бусдыг татан оролцуулах, биеэ үнэлэхийг зохион байгуулах” гэмт хэрэгт буруутгагдан шүүхээс ял сонсож байжээ.

Нарийвчилбал, Г.Батдэлгэр нь 2007-2008 онд ганцаараа болон бусадтай хамтран нэр бүхий 13 эмэгтэйг гадаад улсад гаргаж, биеийг нь үнэлүүлэх зорилгоор бусдад худалдсан болох нь нотлогдож улмаар 2012 оны дөрөвдүгээр сарын зургааны өдөр Сүхбаатар дүүргийн шүүхийн Эрүүгийн шүүхээс 5.6 жилийн хорих ялаар шийтгүүлж байсан байна.

Ийнхүү гэм буруу нь шүүхээр нотлогдож, ял эдлэж байсан этгээдийг төрийн албанд томилсон нь мэдээж хууль зөрчсөн үйлдэл. Тиймээс энэ бүхэнд анхаарал хандуулах учиртай төрийн байгууллага нь эл үйлдэлд соргог хандах буй за. 

Б.Баатар