2021 оны нэгдүгээр сарын 15-ны өдөр УИХ-аас Шүүхийн тухай хуулийг Үндсэн хуулийн үзэл баримтлалд нийцүүлэн баталсан нь шүүхийн бие даасан, хараат бус байдлыг бэхжүүлэхэд чухал алхам болсон. Гэсэн ч хуулийн хэрэгжилт тухайлбал, Шүүхийн ерөнхий зөвлөл, Шүүхийн сахилгын хороог шинэ хуулийн дагуу эмхлэн байгуулах ажил зогсонги байдалд орсонтой холбоотой шүүгчид хариуцлага тооцох, улмаар шүүхийн захиргааны үйл ажиллагаа хэвийн үргэлжлэхэд хүндрэл үүсээд байна.

Уг нөхцөл байдал нь иргэдийн шударга шүүхээр шүүлгэх эрхэд сөргөөр нөлөөлөх эрсдэлтэй тул Шүүхийн тухай хуулийн хэрэгжүүлэхэд онцгой анхаарах шаардлагатай байгаа юм.

Нээлттэй нийгэм Форум нь 2019 оны арваннэгдүгээр сарын 14-нд батлагдсан Үндсэн хуулийн нэмэлт өөрчлөлттэй холбоотой бодлогын хэлэлцүүлгээс эхлэн 2021 оны нэгдүгээр сарын 15-нд Шүүхийн тухай хууль шинэчлэн батлагдах хүртэлх хугацаанд өрнөсөн бодлогын хэлэлцүүлгийг архивлан нэг дороос харах боломжтой мэдээллийн цахим сан болгон нийтэд танилцуулж байна.

Түүнчлэн, 2021 оны хуулийг 2012 болон 2002 оны шүүхийн тухай хуулиудтай агуулгын хувьд харьцуулан тус хуулийг хэрэгжүүлэгч талууд болон хэрэглэгчдэд хүргэж байгааг  хүлээн авна уу. Энэхүү мэдээллийн сан нь ННФ-ын цахим хуудаст байрлах бөгөөд www.shuukh.forum.mn хаягаар орж танилцах боломжтой.  

http://shuukh.forum.mn/?fbclid=IwAR2uhXg9WqUoJqNfA-q7ghhLrIjnABPK5eK5xiqkh2HHpHQEgbQf-lp4Vh4