Энэ долоо хоногт улс төр, нийгэм, эдийн засагт өрнөсөн үйл явдлуудыг “Багц 24” буландаа онцолж байна.

МУГТ Э.Содномпилжээ шинэ рекорд тогтоож, паралимпын алтан медалийн эзэн боллоо

Монгол Улсын гавьяат ГТ Э.Содномпилжээ “Токио-2020” паралимпын пауэрлифтингийн -107 кг жинд шинэ рекорд тогтоож, алтан медаль хүртлээ. 

Монгол усынхаа далбааг Токиогийн тэнгэрт мандуулж, төрийн дууллаа эгшиглүүлсэн гавьяат тамирчин Э.Содномпилжээ пауэрлифтингийн -107 кг-д хүч үзэж, хоёр дахь оролдлогоороо 245 кг-ыг өргөж, паралимпын дээд амжилтыг шинэчлэн тогтоож түрүүлсэн юм.

Хичээлийн шинэ жил эхэлж, Боловсролын сайд МҮИС-аас нэрээ авахаа мэдэгдэв

Коронавирусний халдвар эрчимтэй нэмэгдэж, делета хувилбар газар аваад байгаа ч эрүүл мэнд, боловсрол хоёроо хамт нь авч явах нь зүйтэй гэж үзэн хичээлийн шинэ жилийг эхлүүлэв. Ингэхдээ халдвар хамгааллын дэглэмийг баримтлах нь юу, юунаас чухал гэдгийг албаныхан анхааруулж буй. Хүн амын бүрэн вакцинжуулалт 64.2 хувьд, 12-17 насны хүүхдийн вакцинжуулалт 75 хувьд хүрч, багш сурган хүмүүжүүлэгчид 3 дахь тунд хамрагдсанаар хичээлийн шинэ жилээ танхимаар эхлүүлэх боломж бүрдсэн гэдгийг Ерөнхий сайд Л.Оюун-Эрдэнэ онцолсон.

Цар тахалтай байгаа ч 2021-2022 оны хичээлийн жилд 81 мянган хүүхэд ерөнхий боловсролын сургуульд элсэн орно. Ингэснээр улсын хэмжээнд 700 гаруй мянган сурагч цахим болон танхимын сургалтаар боловсрол эзэмших статистик гарсан байна.

Түүнчлэн энэ долоо хоногт боловсролын салбарт өрнөсөн анхаарал татсан сэдэв нь МҮИС-аас улс нэрээ авах асуудал байв. БШУ-ын сайд Л.Энх-Амгалан Монголын Үндэсний их сургууль гэсэн нэрийг төрд буцааж авахаа мэдэгдсэн. Энэ нь ч олны сайшаалыг хүртэж байгаа.

Харин Монголын Үндэсний их сургуулиас мэдээлэл хийж, Боловсрол, шинжлэх ухааны сайд Л.Энх-Амгаланг уучлалт гуйхыг шаардав. БШУ-ны сайд Л.Энх-Амгалан МҮИС-ийг луйвар хийдэг хэмээн мэдэгдсэн нь гүтгэж, доромжилсон үйлдэл болсон. Тиймээс МҮИС-иас бизнесийн нэр хүндээ хамгаалахаар Сүхбаатар дүүргийн Иргэний хэргийн шүүхэд хандаж байгаагаатус сургуулийн зүгээс мэдэгдлээ. 

Нөхөн сонгуульд нэр дэвшигчид тодорч, С.Жавхлан намаасаа гарч буйгаа мэдэгдлээ

Энэ долоо хоногт улс төр нэлээд бужигнаантай байлаа. Ирэх аравдугаар сарын 10-нд Хэнтий аймгийн 18 дугаар , СХД-ийн 28 дугаар тойргуудад УИХ-ын нөхөн сонгуулийн санал хураалтыг явуулна. Үүнтэй холбогдуулан нам, эвслүүд УИХ-ын нөхөн сонгуульд нэр дэвших хүмүүсээ эцэслэн тодруулсан. 

Сонгинохайрхан дүүргийн 28 дугаар тойрогт болох нөхөн сонгуульд МАН-аас Н.Батшугар, АН-аас Э.Бат-Үүл, ХҮН-аас Б.Найдалаа, Эрх чөлөөг хэрэгжүүлэгч намаас Ш.Төмөрсүх, ШИНЭ намаас Ц.Гантулга, ИЗНН-аас Ш.Гантулга, Үнэн Ба Зөв Намаас А.Отгонбаатар нар дэвшиж байна. Харин Хэнтий аймагт Ардчилсан намаас УИХ-ын гишүүн асан Б.Гарамгайбаатар, МАН-аас тус аймгийн Засаг дарга Ц.Идэрбат нар нэр дэвших юм.

Улс төрд өрнөсөн бас нэгэн үйл явдал нь Ерөнхий сайд Л.Оюун-Эрдэнийн орон тооны бус зөвлөхөөр Ерөнхийлөгч асан Х.Баттулгыг томилсон явдал байв. Энэ нь олны анхаарлыг татаж, шүүмжлэл магтаал хоёрыг зэрэг хүртсэн юм.

Түүнчлэн энэ долоо хоногт УИХ-ын гишүүн асан С.Жавхлан намаасаа гарч буй тухайгаа мэдэгдлээ. Тэрбээр “Миний хувьд “Хамаг монгол” төсөл явуулсан. Үүнтэй холбоотой маш олон санал ирж байна.  Сүүлийн үед АН маш их хэрүүлтэй байна. Хэрүүлтэй айлд хүн тогтдоггүй. АН миний зан, зарчимд нийцэхгүй байгаа учраас тус намаас гарч байна. Хийх ажил их байна. Цаашид олон төсөл хөтөлбөрүүд, соёлын өвөө хамгаалах, уран бүтээлийн ажлаа хийнэ" гэсэн юм. 

Хүний эрхийн мэдрэмжгүй гэдгээ баталсан Б.Одсүрэн даргыг иргэд огцрохыг шаардаж байна

НИТХ-ын төлөөлөгч, Нийслэлийн Зам, тээврийн асуудал хариуцсан төслүүдийн удирдагч Б.Одсүрэнд хүний эрхийн мэдрэмжгүй гэдгээ олонд тунхаглав. 

Тэрбээр өөрийн цахим хуудснаа "Хүүхдэдээ ийм тоглоом авч өгсөн байсан юм. Гэтэл ижил хүйстнийг дэмжсэн, өдөөсөн өнгө, логоо, туг, яриа байдгийг олж мэдлээ. Онцгүй сэтгэгдэл төрлөө, тоглоомыг хогын саванд хийсэн, мөн нийтийн тээвэрт мөнгө төлж рекламаа тавиулсан байсныг нь бас хуулууллаа" хэмээсэн нь олны дургүйцлийг төрүүлсэн. Үнэндээ энэ нь нийтийн албан тушаалтны амнаас гарах ёсгүй үг. Тиймээс ч түүнийг олон нийт огцрох ёстой хэмээж байна. 

Булган аймгийн Засаг дарга Б.Ариун-Эрдэнэ хүний наймааны хэргээр ял эдлэж байсан найзыгаа төрийн албанд томилсон гэх мэдээлэл ил болов

Булган аймгийн Засаг дарга Б.Ариун-Эрдэнэ эмэгтэйчүүдийг хил давуулан худалдаалж, биеийг нь үнэлүүлдэг байсан этгээдийг Төрийн албанд томилсон гэх мэдээлэл олон нийтэд ил болов. Тодотговол, Булган аймгийн Засаг дарга Б.Ариун-Эрдэнэ нь өөрийн дотны найз Г.Батдэлгэрийг тус аймгийн Нөөцийн газрын даргаар томилжээ. Гүржавын Батдэлгэр нь Эрүүгийн хуулийн тусгай ангийн 113.3 буюу “Хүн худалдаалах”, 124.2 буюу “Биеэ үнэлэхэд бусдыг татан оролцуулах, биеэ үнэлэхийг зохион байгуулах” гэмт хэрэгт буруутгагдан шүүхээс ял сонсож байжээ.

Нарийвчилбал, Г.Батдэлгэр нь 2007-2008 онд ганцаараа болон бусадтай хамтран нэр бүхий 13 эмэгтэйг гадаад улсад гаргаж, биеийг нь үнэлүүлэх зорилгоор бусдад худалдсан болох нь нотлогдож улмаар 2012 оны дөрөвдүгээр сарын зургааны өдөр Сүхбаатар дүүргийн шүүхийн Эрүүгийн шүүхээс 5.6 жилийн хорих ялаар шийтгүүлж байсан байна.

Б.Баатар