Төрийн албан хаагч, тэр дундаа удирдах албан тушаал хашиж буй хүмүүсийн үг, үйлдэл бүр нь олны анхааралд байдаг. Тэр ч утгаараа хэлэх үг, хийх үйлдэлдээ ёс зүйтэй хандах учиртай. Гэтэл сүүлийн үед энэ байдал алдагдаж, попрох гэсэн дарга нарын цахим сүлжээнд гаргаж буй авир хэрээс хэтэрлээ. 

Хамгийн сүүлд гэхэд нийслэлийн Засаг даргын Хүний хөгжил, нийгмийн бодлогын асуудал хариуцсан орлогч Ж.Сандагсүрэн цахим сүлжээнд анхаарал татсан зүйл бичиж, олны гайхшируулав. Тэрбээр "Тусгай сургуулийг зогсооно. Ямар ч Кэмбриж, Орос сургууль байхгүй" хэмээн жиргэсэн нь ч олны эгдүүцлийг төрүүлсэн.

Энэ талаар БШУ-ын сайд асан Ё.Отгонбаяр "Боловсролын салбарын бодлогыг энд твиттерт хэн нэгэн дарга биш боловсролын асуудал эрхэлсэн төрийн захиргааны төвв байгууллага боловсруулдаг" гэдгийг түүнд анхааруулаад авна лээ. 

Түүнчлэн олон нийт Ж.Сандагсүрэн ямар учраас Кэмбриж, Орос сургуулийг онцлон тэмдэглэв, тусгай сургуулийн үйл ажиллагааг зогсоож, хүний эрхэнд халдах нь гэгчлэнгээр нэлээд шүүмжилсэн. Тиймээс ч тэрбээр дээрх жиргээгээ устгажээ.

Нэгэнт ам гарвал барьж болдоггүй гэдэг. Хотын орлогч Ж.Сандагсүрэн үнэхээр тусгай сургууль, Кэмбриж, Орос сургуулийн үйл ажиллагааг зогсоох санаархлаа ийнхүү илчилсэн үү, эсвэл дээрх сургуулиудыг сүрдүүлж, эрхэндээ оруулах гэсэн үү гэдэг нь эргэлзээтэй асуулт болж үлдэв. 

Нийслэлийн хэмжээнд тусгай хэрэгцээт сургууль буюу хөгжлийн бэрхшээлтэй хүүхдүүдийн сурдаг зургаан сургууль, Кембриджийн сургалттай “Монгол тэмүүлэл”, “Шинэ эхлэл”, “Шинэ эрин” гэсэн төрийн өмчийн гурван ерөнхий боловсролын сургууль, Орос сургалттай “Русская Гимназия”,  “Логрифм” “Плеханов”, "Орос 3 дугаар сургууль" "Радуга" зэрэг сургуулиуд байдаг аж. 

Ямартай ч цахим сүлжээнд газар аваагүй түүний жиргээний учиг удахгүй тайлагдах буй за. 

Б.Баатар