ХӨСҮТ-ийн ерөнхий захирал Л.Баттөрийг үүрэгт ажлаас нь чөлөөлжээ. Түүнийг Д.Нямхүүг ажилд нь буцаан томилох шүүхийн шийдвэр гарсантай холбогдуулан чөлөөлсөн байж магадгүй байна. 

Тодруулбал, Улсын Нэгдүгээр төрөхөөс коронавирусний халдвартай эхийг ХӨСҮТ рүү халаадтай авч гарсан нь олны дургүйцлийг хүргэж, улмаар тус газрын дарга болон НЭМГ, ХӨСҮТ-ийн дарга нарыг өмнөх сайд Т.Мөнхсайхан албан үүргээс нь чөлөөлж, өөрөө Эрүүл мэндийн сайдын албаас чөлөөлөгдөх хүсэлтээ өгч байсан билээ.

Гэвч уг шийдвэрийг Д.Нямхүү хууль бус гэж үзэн өнгөрсөн хоёрдугаар сарын 18-нд шүүхэд хандсан байдаг. 

Удаан хугацаанд хойшилсон шүүх хуралдаанаас түүнийг ажилд нь эргүүлэн томилох тухай шийдвэр өнгөрөгч наймдугаар сарын 12-нд гарсан юм.

Ташрамд дурдахад, 2016 онд түүнийг албан тушаалаа ашиглан өөртөө нэмэлт урамшуулал, цалин хөлс авдаг нь тогтоогдсон асуудлаар албан үүргээс нь чөлөөлж байсан ч шүүхийн шийдвэрээр дахин томилогдож байв.

А.Сүх