Монгол Улсын Ерөнхийлөгч У.Хүрэлсүх захирамж гаргаж, Авлигатай тэмцэх газрын дэргэдэх Олон нийтийн зөвлөлийн гишүүдийг томилсон талаар бид өмнө нь мэдээлсэн билээ. Дөрвөн жилийн хугацаатай Ерөнхийлөгчийн захирамжаар томилдог дээрх албанд ямар мэргэжил, албан тушаалтай хүмүүсийг томилсон нь өдгөө олны анхаарлыг татаж буй. Тэгвэл Ерөнхийлөгч У.Хүрэлсүх, Ерөнхийлөгч асан Х.Баттулга нарын захирамжаар томилогдсон эрхмүүдийн товч танилцуулгыг хүргэж байна.

Ерөнхийлөгч У.Хүрэлсүхийн томилгооны гол сэдэв Ангууч буюу Б.Баттөр болоод байна

Ерөнхийлөгч У.Хүрэлсүхийн захирамжаар Авлигатай тэмцэх газрын дэргэдэх Олон нийтийн зөвлөлийн даргаар Г.Ганбатыг томилжээ. Харин Хуульч, өмгөөлөгч Г.Баасанг зөвлөлийн гишүүнээр улираан томилсон байна. Мөн гишүүнээр Иргэний шударга шүүх ТББ тэргүүн, Монгол хүний төлөө намын дарга Х.Батялалт, Азийн сан ТББ-ын менежер А.Баянмөнх, Арц суврага ХХК, нярав Ц.Батболд, Нээлттэй Нийгэм Форум ТББ, хөтөлбөрийн менежер П.Бадамрагчаа, Ангууч буюу Б.Баттөр, Д.Гантөмөр, Эрдэс Оюу Толгой ХХК зөвлөх Д.Даваадорж, Транспэрэнси Интернэшнл-Монгол ТББ дэд захирал Э.Мөнхжаргал, Авлигатай тэмцэх газрын дэргэдэх олон нийтийн зөвлөлийн гишүүн Ц.Нарангэрэл, Өшиг ХХК, isee.mn, эрхлэгч, ерөнхий захирал М.Отгонбаяр, Хэвлэл мэдээллийн зөвлөлийн удирдах зөвлөлийн гишүүн Л.Оюунтунгалаг,  Eagly Телевизийн тоймч Б.Отгон нарыг томилжээ. 

Орон тооны бус Олон нийтийн зөвлөл нь 15 хүний бүрэлдэхүүнтэй байдаг бөгөөд дөрвөн жилийн бүрэн эрхтэйгээр ажилладаг юм. Тиймээс 2017 онд Ерөнхийлөгч Х.Баттулгын томилсон гишүүдийн хугацаа дууссан тул ийнхүү дараагийн гишүүдийг Ерөнхийлөгч У.Хүрэлсүх захирамж гаргаж томилсон байна.

Ерөнхийлөгч асан Х.Баттулга дөрвөн жилийн өмнө дараах эрхмүүдийг томилж байв

2017 оны наймдугаар сарын 29-ны өдөр Ерөнхийлөгч Х.Баттулга захирамж гаргаж дараах хүмүүсийг томилж байжээ.

Тодотговол, Монголын хуульчдын холбооны гишүүн, өмгөөлөгч Г.Баасанг ОНЗ-ийн даргаар томилж байсан юм. Харин гишүүнээр “Легитимус” ТББ-ын хуулийн зөвлөх, хуульч Б.Анхныбаяр, “Шинэ Улаанбаатар” ТББ-ын Удирдах зөвлөлийн гишүүн Э.Батсуурь,  Улс төр боловсролын академийн Удирдах зөвлөлийн гишүүн Р.Бурмаа, “Нарны зон” НҮТББ-ын тэргүүн Э.Бямбацэрэн, "Хамтын халуун сэтгэл” ТББ-ын Удирдах зөвлөлийн гишүүн Б.Ганхөлөг, “Алтан элч” гэр бүлд эрх зүйн туслалцаа үзүүлэх төв ТББ-ын төлөөлөл Д.Дэлгэрбат, Монголын малчид, мал аж ахуйн үйлдвэрлэл эрхлэгчдийн холбооны тэргүүлэгч И.Мөнхжаргал, Хууль зүйн мэдээлэл, судалгааны хамтын ажиллагааны нийгэмлэгийн Удирдах зөвлөлийн гишүүн Д.Оросоо, Техник, загвар зохион бүтээгч спортын холбооны Удирдах зөвлөлийн гишүүн С.Отгонгэрэл, “Нутгийн шийдэл сан” ТББ-ын тэргүүн, ном зохиогч Ц.Оюунгэрэл, Монголын хуульчдын холбооны гишүүн, өмгөөлөгч Д.Пүрэвбаатар, “Шууд ардчилал хүрээлэн” ТББ-ын захирал А.Саруул, МоАХ-ны Удирдах зөвлөлийн гишүүн О.Цоодол, “Либерал хаус” бодлогын судлалын хүрээлэнгийн Удирдах зөвлөлийн гишүүн Б.Энхбат нар ажиллаж байсан юм.              

Б.Баатар