Ерөнхийлөгчийн сонгуулиас хойш нам гүм байсан Ардчилсан намын дотоод тэмцэл дахин ширүүсч эхлэв. Хэдхэн хоногийн өмнө Ардчилсан намын дарга М.Тулгат хэвлэлд өгсөн ярилцлагадаа "Ц.Туваан, З.Энхболд нарт хариуцлага тооцох ёстой гэсэн гомдол Ардчилсан намын гишүүд ихээр ирүүлж буй учир тэднийг намаасаа хөөхөөр болсон гэдгийг онцолсон.

Гэвч энэхүү мэдээллийн дараа Ардчилсан намын Үндсэн дүрмийн хорооноос мэдээлэл хийж, тус намын гишүүн Ц.Туваан, З.Энхболд болон нэр бүхий гишүүдийг намаас хөөх үндэслэл байхгүй хэмээн мэдэгдсэн билээ.

Тодруулбал, Ардчилсан намын Үндсэн дүрмийн хорооны дарга Б.Мягмардаш "Ардчилсан намын Үндсэн дүрмийн хорооны дүгнэлтийн дагуу Ц.Туваан, З.Энхболд нарын нэр бүхий гишүүдийг дөрвөн жилийн хугацаатай намын бүртгэлээс хассан гэдэг нь буруу ташаа мэдээлэл. Тийм зүйл байхгүй.

Одоо ажиллаж буй Ардчилсан намын Үндсэн дүрмийн хороон 2017 оны Ардчилсан намы долдугаар их хурлаар батламжлан дөрвөн жилийн хугацаатай томилсон. Уг дүрмийн хорооны гишүүдийг 2021 оны дөрөвдүгээр сард дахин сунгасан бөгөөд Д.Мягмардаш даргатай үндсэн дүрмийн хороо нь албан ёсны дүрмийн хороо юм. 

Ардчилсан намын даргаар ажиллаж байсан С.Эрдэнэ нь 2020 оны зургаадугаар сарын 26-ны өдөр өөрийн хүсэлтээр намын даргаас чөлөөлөгдөх өргөдлөө өгсөн. Уг өргөдлийг Ардчилсан намын Үндсэн дүрмийн хороо 2020 оны долоодугаар сарын гуравны өдөр хэлэлцэн Үндсэн дүрмийн 3.10-т заасан нөхцөл байдал үүссэнийг тогтоон баталгаажуулсан. С.Эрдэнэ нь Монгол Улсын Дээд шүүхэд 2021 онд өөрийгөө Ардчилсан намын даргаар сэргээн бүртгүүлхээр 3 удаа хүсэлт хүргүүлсэн тухай бүрт С.Эрдэнийг Ардчилсан намын даргаар бүртгэхээр татгалзсан" хэмээн мэдээлсэн байдаг.

Тэгвэл Ардчилсан намын С.Эрдэнэ цахим хаягаараа дамжуулж түүнд хариу барив.

Энэ талаар тэрбээр “Би өнөөдөр нэгэн цагт сайхан хамтарч явсан нөхрөө (Мягмардаш) намайг шүүмжилж, намаа муулж өөрийнхөө гаргасан шийдвэрээ үгүйсгэн сүржигнэж суухыг хараад үнэхээр гайхлаа. Би нөхрийнхөө Гавьяат цолыг өөрийгөө худалдан байж авсанд үнэхээр гайхаж, ийм хямдхан байсанд нь харамсаж суусан” гэжээ. 

Б.Баатар