УИХ-ын гишүүн О.Баасанхүү саяхан нэг сонинд ярилцлага өгөхдөө  Н.Энхбаяртай уулзах боломжийн тухайд “Зөвшөөрөл өгөхгүй байна. Нийслэлийн шүүхээс нэг л удаа зөвшөөрөл өгсөн. Тэр нь гадаадын хүнтэй уулзахад нь орчуулагчийн үүрэгтэйгээр өгсөн юм. Түүнээс биш хувиараа уулзах гэхэд зөвшөөрөл өгөхгүй байна” гэж хэлжээ. Н.Энхбаярын өрөөнд шүүхийн зөвшөөрөлтэй нэвтэрч ордог, орохдоо УИХ-ын гишүүнээр орчуулга хийлгэдэг, тэгээд манай харьяат бус гадаад хүн хэн байв гэдэг асуултыг харин ярилцлага авсан сэтгүүлч асууж чадаагүй нь харамсалтай.

   Гэвч энэ загатнасан асуултын хариулт болгон маргааш нь шахуу УИХ-ын гишүүн О.Баасанхүү, МАХН-ын ерөнхий нарийн бичгийн дарга Г.Шийлэгдамба нар нөгөө гадаад хүнээ дундаа суулгаж байгаад хэвлэлийн бага хурал хийжээ. О.Баасанхүүгийн орчуулгаар Н.Энхбаяртай орж ярилцсан хүн бол Нью Йоркт төвтэй “Debevoise & Plimpton” хуулийн компаний хуульч Жон Миссинг байв. Энэ компанийг Н.Энхбаярын гэр бүл хөлслөн авсан тухай өнгөрсөн хавар хэвлэлүүд мэдээлж байсан билээ. Ноён Ж.Миссинг харин энэ хэвлэлийн бага хурал дээр компанийхаа нэрийг дурдсангүй “олон улсын хүний эрхийн хуульч” гэсэн тун даруухан тодотгол нэрийнхээ өмнө зүүж, давж заалдах шатны шүүх хурлыг ажиглахаар ирсэн гэв. Н.Энхбаярын өмчлөлтэй “Зууны мэдээ” сонинд “Debevoise & Plimpton”-ий өмгөөлөгч ярихдаа:
-Би төдийгүй олон улсын хуульчид энэ шүүх хурлыг анхааралтай ажиглаж байгаа... Хүний эрх зөрчсөн зүйл зүйл цөөнгүй байсан. Youtube-ээс харж байхад нэг хүнийг баривчлахын төлөө хэдэн зуун хүнтэй баг гаргана гэдэг жирийн үзэгдэл биш... Шүүх нөлөөнд автсан байхыг үгүйсгэхгүй гэжээ.
Мөн 1990 онд буюу 22 жилийн өмнө АНУ-ын Колумбия дүүрэгт эрх зүйн туслалцаа үзүүлэх лиценз авсан ноён Миссинг хүний эрхийн чиглэлээр 30 жил ажиллаж байгаагаа “Зууны мэдээ”-д хэлжээ.
Түүний төлөөлж буй “Debevoise & Plimpton” компани Н.Энхбаярын гэр бүлд ямар үнэ хөлстэйгээр өмгөөлөл үзүүлж байгаа, төлбөрийг хэн төлсөн, Монголын талын гол өмгөөлөгч болох С.Нарангэрэлтэй ямар харилцаатай байгаа, давж заалдах шатны шүүхэд ялагдвал өмгөөллийн дараагийн алхам юу вэ зэргийг нь харин манай сэтгүүлчид асууж “зүрхэлсэнгүй”.
“Debevoise & Plimpton”-ий Лондон дахь түнш лорд Питер Голдсмит өнгөрсөн хугацаанд компанидаа Монгол улс, Н.Энхбаярын чиглэлийг голлон хариуцаж ирсэн юм. Их Британы ерөнхий прокуророор ажиллаж байгаад олон улсын зэвсгийн наймааны дуулианы улмаас огцорсон энэ хүн өнгөрсөн хавар “Монгол улс зөвлөлтийн үеийн гинжнээсээ салсан байх гэж найдаж байна. Гэхдээ өрнөж буй үйл явдал зөвлөлтийн үеийг санагдуулж байна” гэж мэдэгдэж байв. “Ерөнхийлөгч Ц.Элбэгдорж няцааж байгаа ч болж буй үйл явдал бүх зүйлийг төвөөс улс төрийн өрсөлдөгчөөсөө салахын тулд хийгдэж байна гэж дүгнэхэд хүргэж байна” гэж ноён Голдсмит мөн “оношилж” байсан билээ.
Питер Голдсмит болон “Debevoise & Plimpton” хулийн компани нь Оросын олигарх Бадри Патаркацишвили, Беларусын мөнхийн ерөнхийлөгч  Александр Лузашенко нартай нягт хамтран ажиллаж иржээ. Түүнийг Беларусын тусгай алба буюу КГБ-тэй холбогдон хууль зөрчин хүн хулгайлсан тухай нь хэвлэлд ил болсны дараа л “Debevoise & Plimpton” өмгөөллөө зогсоосон юм. Аллага, авилгал, тусгай ажиллагаа тойрсон үйлчлүүлэгчдээрээ тэрээр хэвлэлийнхний бай болсоор ирсэн юм. Харин энэ жил олон улсын сонинуудад ноён Голдсмитийн нэр Монголын экс ерөнхийлөгчтэй холбоотойгоор олон удаа гарч байна.

   Н.Энхбаярын өмгөөлөгч Питер Голдсмитийг “Debevoise & Plimpton” тухайн үед 1 сая фунтийн урамшуулалтайгаар шинэ албанд авч ажиллуулж байгаа гэж 2007 оны 9 сарын 27-нд “The Guardian” сонин бичиж байжээ.
   Өндөр албан тушаалд ажиллаж байсан үйлчлүүлэгч Н.Энхбаярын өндөр үнэтэй гадаад өмгөөлөгч нарын дараагийн алхам юу байх бол? “Debevoise & Plimpton”-ий өнгөрсөн хугацаанд хийсэн ажлууд нь стратегийн өмгөөллийн шинжтэй бөгөөд олон улсад “Монголд хүний эрх зөрчигдөж байна, ардчилллаас ухарлаа” гэдэг дуулиан дэгдээх, барууны эрх баригчдад лобби хийхдээ санхүүгийн багагүй нөөц гаргаж байгаа нь анзаарагддаг. “Debevoise & Plimpton”-ий түнш лорд Голдсмит Беларусын дарангуйлагчийн эсрэг олон улсын худалдааны хориг арга хэмжээг цуцлуулах гэж Америкийн сенат, төрийн департментын албаны хүмүүстэй хөөцөлдөж явсан саяхны түүх бий.