Манай улсад аливаа асуудлыг хэн хамгийн сайн сэвж, ямар хэмжээний жагсаал, цуглаан зохион байгуулсан гэдгээрээ албан тушаалаар шагнагддаг жишиг хэдийнэ тогтжээ. Хөхөө өвлийн хүйтэнд хөдсөн дээлтэй жагсаж, "МАНАН дэглэмийг усгана" хэмээн олныг уриалж, ард түмний итгэлийг хүлээж явсан "Шударга тав" үүргээ биелүүлж, зорилгодоо хүрэв. 

"Шударга тав" хэмээн өөрсдийгөө цоллож явсан эрхмүүд бол Л.Оюун-Эрдэнэ Х.Нямбаатар, Т.Аюурсайхан, Ж.Батзандан, Л.Болд нар. Тэд "Зөвхөн шударга ёсны төлөө жагсаж байна. Бид ямар нэгэн албан тушаалд очихгүй" хэмээж байсан ч бүгд улс төрийн томоохон албан тушаалд томилогдсон.

Тодотговол, Л.Оюун-Эрдэнэ: Тэрбээр дээрх жагсаалын дараа буюу 2021 онд Монгол Улсын 32 дахь Ерөнхий сайдаар томилогдсон. Л.Оюун-Эрдэнэ Д.Сүхбаатарын талбайд жагсаж байх үеэрээ "Засгийн Газрын хэрэг эрхлэх газын даргын албан тушаалд очихгүй" хэмээж байсныг олон нийт мартаагүй. 

Х.Нямбаатар: Л.Оюун-Эрдэнийн Засгийн газар бүрэлдэх үед ХЗДХ-ийн сайдаар томилогдсон. Үүгээр зогсохгүй Оюутолгойн ажлын хэсгийн ахлагч, Гадаадын хөрөнгө оруулагчдын эрх ашгийг хамгаалах ажлын хэсгийг ахлагч, Авлигын индексийг бууруулах ажлын хэсгийн ахлагч, Мөнгө угаах, терроризмыг санхүүжүүлэхтэй тэмцэх Үндэсний зөвлөлийн дарга, Боксын холбооны ерөнхийлөгчийн албыг хашиж яваа нэгэн. Энэ олон албыг хашдаг түүнийг албан тушаалын хэнээтэн гэгдэх болоод буй. 

Т.Аюурсайхан: "Шударга тав"-ын гол дүрд тоглосон тэрбээр өдгөө УИХ-ын дэд даргын албыг хашдаг. Мөн Монгол Улсын Их Хурлын Аюулгүй байдал, гадаад бодлогын байнгын хорооны даргаар ажиллаж байна. 

Ж.Батзандан: Шударга ёс хэмээн жагсаал цуглаан зохион байгуулж олонд танигдсан тэрбээр "Шударга тав"-ын дүрд ч тоглоод амжсан. Үүнийхээ шанд Австрали улсад суух элчин сайдын зөвлөхөөр томилогдсон гэдгийг хэлэх хүн олон. Гэвч тэрбээр дээрх албан тушаалдаа сэтгэл дундуур явдаг гэдгээ саяхан илчилсэн билээ. Тодруулбал, Ж.Батзандан саяхан өөрийн албан ёсны цахим хуудснаа “Цөллөгийн газраас бичсэн тэмдэглэл” хэмээх ном бичиж байгаа талаараа жиргэсэн нь дээрх дүгнэлтэд хүргээд буй. 

Л.Болд: “Шударга тав”-ын далбаан доор намирч явсан тэрбээр албан тушаалын бялуунаас хоосон хоцроогүй. Ерөнхий сайд Л.Оюун-Эрдэнэ түүнийг Бельгийн хаант Улсад суух онц бөгөөд бүрэн эрхт элчин сайдаар томилсон. Энэ нь ч тэд нэг завинд суусан улстөрчид гэдгийг илтгэж байгаа юм. 

Энэ мэт шударга ёс гэх сайхан үгээр халхавч хийж, олны итгэлийг олж, жагсаал цуглаан зохион байгуулж, эцэст нь өөрсдөө улс төрийн томоохон албан тушаал хүртдэг гажиг тогтолцоог халах цаг болсныг олон нийт хэлж, шударга ёсыг шаардаж байна. 

Б.Баатар