Ерөнхий сайд Л.Оюун-Эрдэнэ овжин ажиллалаа. Гэхдээ тэр ард түмнийхээ төлөө бус, албан тушаал, эрх мэдэлтэйгээ үлдэхийн тулд өөр дээрээ тулгараад байсан асуудлыг өөр тийш нь хандуулж чадав.

Өнгөрсөн баасан гарагт Үндэсний соёл амралтын хүрээлэнд болсон ICT экспоны нээлтийн үеэр олон зуун хүн цуглуулж, халдвар хамгааллын дэглэм зөрчиж, ард иргэдийнхээ амь нас, эрүүл мэндэд заналхийлсэн Ерөнхий сайд Л.Оюун-Эрдэнийг огцрох ёстой хэмээн олон нийт давалгаалж, шаардаж байв. Энэ нь ч зүй ёсны шаардлага.

Жил орчим коронавирусний цар тахалтай тэмцэж буй мянга мянган эмч нарын хөдөлмөр, хөлс хүч, халдвар хамгааллын дэглэмээ ягштал баримтлаж ирсэн ард иргэдийнхээ итгэл сэтгэлийг уландаа гишгэсэн дээрх үйлдэлдээ тэр хариуцлага хүлээх учиртай. Үүнийг ард түмэн шаардаж байна.

Гэтэл Ерөнхий сайд Л.Оюун-Эрдэнэ эл асуудлыг шатахууны хомсдол гэх дуулианаар нам дарж орхив. Тодотговол, Ашигт малтмал, газрын тосны газрын Газрын тосны асуудал хариуцсан орлогч дарга Ц.Эрдэнэбаяр долоохон хоногийн өмнө "АИ 92 бензины 21 хоногийн нөөцтэй байгаа. Үнэ нэмэгдэхгүй" хэмээн мэдээлж байсан. Гэтэл өчигдөр салбарын сайдтайгаа нийлж байгаад "АИ 92 бензины хомсдол үүссэн, нийслэл ердөө дөрөв хоногийн нөөцтэй үлдсэн. Бид бүхий л арга хэмжээг авч ажиллаж байна" хэмээж дуулиан дэгдээж, асуудлыг өөр тийш нь хандуулж дөнгөв.

Энэ нь Ерөнхий сайдыг огцруулахыг шаардсан олон нийтийн давалгааг түр хугацаанд дарахаас бус ард түмний амьдралд ямар олон асуудал дагуулж, эргээд өөрөө үүндээ ороогдох улам том "гал" болно гэдгийг тооцсонгүй бололтой. 

Шатахууны хомсдол үүсэж, үнэ нэмэгдэхийн хирээр өргөн хэрэглээний бараа бүтээгдэхүүний үнэ дагаад өсдөг бичигдээгүй хууль манай улсад үйлчлээд удаж байгаа. Энэ зовлон ард түмний нуруун дээр ирэх нь Ерөнхий сайд аа. 

Үнэхээр шатахууны хомсдол үүсч байсан бол энэ хүртэл яагаад арга хэмжээ авсангүй вэ, долоо хоногийн өмнө яагаад худал мэдээлэл түгээв, Монгол Улс хэзээ шатахуунтай болох вэ, өргөн хэрэглээний барааны үнэ өсөхгүй гэх баталгаа бий юу гэх олон асуулт хариултаа нэхэж байна. 

Энэ бүхэн ч Ерөнхий сайд Л.Оюун-Эрдэнэ толгойлж буй Засгийн газартай холбоотой асуудал. Үүнээс тэр бултах боломжгүй. 

Б.Баатар