Ардчилсан намаас "Шатахууны хомсдол бол хямралын эхлэл" сэдвээр мэдээлэл хийлээ.

Ардчилсан намын зүгээс дараах гурван шаардлагыг Засгийн газарт хүргүүлж байгаа аж. Тодруулбал, Засгийн газрын ковидын хуулиа цуцлах, хоёрдугаарт, ажлын зохион байгуулалтандаа шинэчлэл хийх, гуравдугаарт, хүндрээд байгаа гадаад бодлогын асуудал дээр онцгой анхаарч шинэ бодлого баримтлахыг шаардаж байгаа юм байна.

Энэ талаар Ардчилсан намын Улс төрийн бодлого хариуцсан нарийн бичгийн дарга С.Буяндэлгэр "Өнөөдрийн хэвлэлийн хурлаар хоёр асуудлыг онцлож, Засгийн газарт шаардлага хүргүүлж байна.

Нэгдүгээрт, хэдхэн хоногийн өмнө Цахим үндэстэн гэх арга хэмжээ боллоо. Цар тахлын хүнд нөхцөлд байгаа үед маш олон хүнийг цуглуулж ийм арга хэмжээ зохион байгууллаа. Ковидын хуулиар олон хүн цуглуулахыг хориглосон байгаа. Гэтэл Ерөнхий сайд нь хуулиар зөрчөөд олон хүн цуглууллаа. Үнэхээр коронавирусийг тоохгүй байгаа бол аж ахуйн нэгжүүдийг хааж боохоо боль. Хоёрдугаарт ковидын үеийн хуулийг цуцлахыг шаардаж байна. Үүнийг иргэд шаардах эрхтэй. Дуртай үедээ хөл хориод, дуртай үедээ цэнгээд байж болохгүй. Хоёрхон тойргийн нөхөн сонгуульд ийм өндөр ач холбогдол өгч олон нийтийн амь амьдралыг золиослож байна. Иймээс ковидын хуулийг цуцлахыг шаардаж байна.

МАН 2021 оны Ерөнхийлөгчийн сонгуульд амжилттай оролцохын тулд ковидын хуулийг санаачилсан. Гамшгийн тухай хуульд нэмэлт өөрчлөлт оруулж мөрдөөд явж болох байсан. Гэтэл ковидын хуулийг яаран баталж, Засгийн газарт бүрэн эрх олгосон. Үүнийг шаардахаас өөр арга алга. Үнэхээр ард түмний амьдрал сайхан байсан бол үүнийг шаардах шаардлага байхгүй. Шатахуунаа нөөцөлдөггүй, ажлаа хийж чаддаггүй Засгийн газар ямар хэрэгтэй юм бэ. Засгийн газар ажлаа зохион байгуулалттай хийж чадахгүй байгаагийн улмаас өнөөдөр шатахууны хомсдол үүслээ. 

Иймээс Ардчилсан намын зүгээс дээрх гурван шаардлагыг Засгийн газарт хүргүүлж байна" гэлээ.  

Б.Баатар