Засгийн газрын хуралдаан өнөөдөр болж, гаргасан шийдвэрийг танилцуулж байна.

Уул уурхай хүнд үйлдвэрийн сайд Г.Ёндон "Шатахууны хомсдолын талаар өнөөдөр хэлэлцлээ. Бид "Роснефть" компанитай 2018 онд байгуулсан гэрээний дагуу ас сар бүр 28 мянган тонн бензин авах ёстой. Гэвч өнгөрсөн наймдугаар сард тэд 17 мянган тонныг нийлүүлэх боломжтой гэсэн тул БНХАУ-аас 43 мянга 300 тонн бензин авах захиалга өгөөд, мөнгөө төлсөн байсан.

ОХУ-аас 17 мянган тонн бензин ирнэ гэж тооцсон ч энэ сард 7500 тонныг нийлүүлсэн. Үлдэгдлийг аравдугаар сарын нэгэн хүртэл нийлүүлэх боломжгүй гэсэн юм. Мөн БНХАУ-ын талаас Хөх хотын боловсруулах үйлдвэрээс манай улсад бензин нийлүүлэх боломжгүй гэсэн юм. Бид найм хоногийн турш бензинийг хязгаартай худалдах боллоо. Бээжинд суугаа Элчин сайд ноот бичиг өгч, холбогдох хүмүүстэй уулзаж байна. Тус улсад сүүлийн хоёр хоног амралтын өдрүүд таарсан. Энэ асуудлыг шийдэхээр ажиллаж байна. Хөх хотоос Жинин өртөөн дээр саатаж, Замын-Үүдээр дамжин бензин ачсан галт тэрэг орж ирнэ. Тээврийг аль болох хурдан хийхээр ажиллаж байна. Учир нь хоёр галт тэрэгнээс нөгөө рүү нь ачна, агуулахад буулгасны дараа аж ахуйн нэгжүүд авах гээд олон шат дамжлага бий. Манай ОБЕГ, арми өөрийн нөөцтэй. Бүх хэрэглэгчид жигд хүртээхийн тулд бид хязгаарлалт тавьж байна.   

Ерөнхий сайд даалгасны дагуу Уул уурхай хүнд үйлдвэрийн яам буруутай гэж үзсэн албан тушаалтанд арга хэмжээ авна. Хаанаа алдаа гарсан байна гэдгийг шалгана. Мэдээллийн алдаа байна уу, боловсруулалтын алдаа байна уу, ажилдаа хайнга хандсан уу гэдгийг эхлээд тогтоож байгаад хариуцлага тооцно" гэв.   

Б.Баатар