Стратегийн бүтээгдэхүүн болох шатахууны хомсдол Монгол Улсыг нөмрөөд байхад салбарын сайд нь бурууг бусад руу чихэх талаар л бодож суугаа нь харамсалтай.

Уул уурхай, хүнд үйлдвэрийн сайд Г.Ёндон өнөөдөр болсон хэвлэлийн бага хурал дээр “Алдаа гаргасан албан тушаалтанд хариуцлага тооцох асуудлыг салбар дотроо ярина” гэж мэдэгдэв.

Угтаа бол энэ салбарыг Засгийн газрын өмнө, цаашилбал УИХ-ын өмнө, бүр томоор хэлбэл ард түмний өмнө хариуцаж байгаа хүн нь нөхөр Г.Ёндон өөрөө. Гэвч тэрээр өнөөг хүртэл хариуцлага гэх үгийг ганхийгээгүй бөгөөд ганц удаа дугарахдаа алдаа гаргасан хүнийг яаман дотроосоо олно гэж мэдэгдлээ.

Ер нь эндээс харахад Г.Ёндон сайд өөрөө хариуцлага үүрэх дургүй хүн гэдэг нь мэдрэгдэнэ. Тэр “Монголросцветмет” ТӨҮГ-ын орлогч захирал байхдаа төрсөн хоёр хүүхдийнхээ сургалтын төлбөрийг төлөх хариуцлагаас бултаж, улсын мөнгөөр төлүүлж явсан нэгэн.

Тийм хүн өөрийнхөө ажлын хариуцлага алдсан явдлыг яамны хэн нэгэн төрийн албан хаагчид тохох юу ч биш биз.  Шатахууны хомсдол тойрсон энэ сэдэв гэнэт л өчигдөр гараад ирсэн юм биш. Хэдэн өдрийн өмнөөс, бүр тодруулбал нефть импортлогчид АИ 92 автобензины үнийг нэмэх үеэс л хөндөгдөж байсан.

Хэн хэн нь ажлаа тийшээ чиглүүлж, анхаарлаа хандуулсан бол нөхцөл байдал өнөөдрийх шиг дордохгүй байсан нь мэдээж. Гэвч тэгсэнгүй. Г.Ёндон сайд ёс юм шиг ажлаас бултаж, хариуцлагаас зугтсаар өнөөдрийг хүргэсэн гэхэд болно.

Ер нь юм хэлээгүй, ажил хийгээгүй хүн л алдаа гаргадаггүй гэдэг. Угтаа бол ажил хийдүүлэх нь алдаж, оноод урагшлуулахаас долоон дор юм билээ. Гэвч өнөөг хүртэл ОХУ-тай ч, нефть импортлогч компаниудтай ч, үнийн өсөлттэй ч холбоотой асуудлаар АМГТГ-ын орлогч дарга Ц.Эрдэнэбаяр л мэдээлэл өгч ирсэн. Энэ бол улс эх орны амин чухал, стратегийн бүтээгдэхүүн атал нөөц, нийлүүлэлт, үнэ гээд бүхий л зүйл дээр Г.Ёндон сайдын оролцоо харагдахгүй байв.

Угтаа бол энэ л жинхэнэ энэ салбарын сайдын ямбыг эдэлж буй хүний үүрэх хариуцлага баймаар юм. Харамсалтай нь, улс төр, геополитикийн томоохон “тулаан” руу цэргээ түлхчихээд, өөрөө үг дуугүй суусаар өнөөдрийн ийм байдал хүргэсэн буруутан нь яах аргагүй Уул уурхай, хүнд үйлдвэрийн сайд Г.Ёндон билээ. Харамсалтай нь тэр хариуцлагаас бултдагаараа буруугүй болоод л дуусч мэдэх нь.

С.Сүлд